GITATAW sa conditioning coach ni pound-for-pound champion Manny Pacquiao nga si Alex Ariza nga delikado gyud nga kontra si Mexican Antonio Margarito sukwahi sa pagtuo sa uban.
Gipasabot ni Ariza nga lig-on gyud kaayo ang apapangig si Margarito ug dili kini bastabasta matumba hinungdan nga wala niya gitago nga aduna sab gyud siya’y kabalaka.
“He’s durable and this is a dangerous fight for Manny,” matod ni Ariza sa inertbyu sa Los Angeles Times.
Nagkanayon si Ariza nga dili sama kang Joshua Clottey nga wala na nanukmag sa pagpakigbatok niini kang Pacquiao, si Margarito andam gyud nga makigbinayloay og kumo.
“He won’t be like Clottey, who did not throw punches. Margarito will be in there trading punches with Manny,” dugang ni Ariza, kinsa mouban ni American trainer Freddie Roach sa pag-anhi sa nasod karong Septiyembre 13 alang sa pagsugod sa training camp ni Pacquiao.
Sa laing bahin, usa ka kasaligang tinubdan ang nipabuhagay nga klaro-klaro na gyud nga mapahigayon ang away sa Dallas Cowboys Stadium karong Nobiyembre 13.
Si Margarito nakaeskedyul nga motunga sa California State Athletic Commission ugma sa pamasin nga makakuha pagbalik og lisensya sa boksing.
Kon mahitabo kini, hayan segurado na sab nga makakuha siya og lisensya sa Texas ug ning higayuna, puwede na siyang moaway sa Dallas Cowboys Stadium.
Si Margarito nasuspenso gumikan kay nasakpan kining naggamit og pampagahi nga kemikal sa iyang handwrap sa ilang away ni Sugar Shane Mosley kaniadto.
“We’ll have something to announce about where this fight will be by the end of the week,” matod ni Top Ran boss Bob Arum, promoter nila ni Pacquiao ug Margarito.
Dili pa lang kaayo dugay, ang business manager ni Pacquiao nga si Michael Koncz niadtong sa Abu Dhabi apan iyang nasuta nga mas nindot gyud ang tanyag sa Dallas Cowboys.