BAYHOH nga makahadlok. Kini unta ang hulga nga anaa sa landong ug hitsura sa pulis ngadto sa mga kriminal, kawatan ug tulisan sa kadalanan sa dakbayan.

Apan tagsa rang makita ang mga Pulis diha sa delantera, suok ug eskina.

Updates on President Benigno Aquino III's presidency

Ang resulta makakitbi sa atay. Daghang pagpatay ang mahitabo sa mga hired killer. Di maihap ang tulis, panguot ug panglabni sa kadalanan nga makapalisang sa mga pedestrian.

Anaa ni sila bisan asa labi na sa mga crossing points. Sa Colon, eskina Leon Kilat-P. del Rosario, Osmeña Blvd.ug sa mga dapit nga duol sa mga dagkong tunghaan.

Kausa niana, pagpanglabang gyud sa mga tawo gikan sa direksiyon sa E-mall ngadto sa Asian Computer Technology (ACT) may gilabnihag bag. Nisinggit kinig tabang, apan layo na kaayo ang kawatan.

Nihilak og maayo ang hamtong babaye kay sa sulod sa iyang bag mao ang iyang salapi, cell phone, alahas nga bag-ong gipalit ug daghan pang mga importante niyang mga butang sama sa ID’s ug credit cards.

Giusban nig makadaghan, apan ang mga biktima sa akong napanid-an di na mosinggit og pulis! pulis! kay dugay na man god nga kini sila di makita sa kadalanan sa dakbayan.

Kaniadto panahon ni Mayor Serging Osmeña makita ang mga pulis sa mga eskina sa siyudad magtinagurha gawas sa mga pulis nga traffic enforcer. Hangtod sa panahon ni Mayor Yoyong Borres duna gihapoy police visibility ang kadalanan.

Nagkaanam kawala ang police visibility sugod sa dekada ’80. Nigrabe sa ’90 hangtod di na gyud makita ning panahuna.

Okey lang kon tinuod ang gisulti nga kuwang tag mga pulis kay way budget kay pila ra may pagpausbaw sa pundo.

Apan ang laing gisulti mao ang mga pulis kadaghanan nag-security aide sa mga pulitiko aron makasapi. Ang uban sad kuno nag-moonlighting sa mga buhatang pribado.

Kinsa may di gusto nga modaghan ang kita sa tinarong nga paagi ning panahon karon sa kalisod. Apan di sa paagi nga biyaan ang katungdanan diin mabutang sa kakuyaw ang kahimtang sa kinabuhi sa katawhan.

Kini lang pagdaghan sa mga hired killer sa atong katilingban ang mabasol di man ang mga metro aide kon di ang kapulisan nga maoy nagbantay sa kahusay ug kalinaw sa katilingban.

Kini sang pagdagsang sa mga kawatan, tulisan, mangunguot, manglalabni ug mangingilad di man nato ikabasol sa mga kaminero kon di sa mga magbalantay sa kalinaw.

Lisod espilingon nga sa kadugay na sa panahon nia gihapon ta nag-atubang sa maong suliran. Hangtod kanus-a kita makasinatig alibyo sa atong kahimtang karon. Nagkadugay, nagkagrabe.

(gapasan.erns@yahoo.com)