KINING tinguha sa pipila nato ka mga mag-babalaod sa pag-usab sa petsa sa piniliay alang sa Barangay ug sa Sangguniang Kabataan mao unyay makapasamot og kalibog sa pagpadagan sa renda sa pangagamhanan.
Ang nakaparat ra ba kay wa sila magkasinabot sa petsa nga ilang gisugyot diin nila gustong iuswag ang piniliay.
Dunay mipabuhagay nga sa Oktubre sunod tuig ipahigayon, duna usay miingon nga sa 2012 na lang kini himuon.
Ning uwahi lang, ang beteranong senador nga si Juan Ponce Enrile, ang presidente sa senado, gusto nga idungan na lang kini sa regular nga eleksiyon sa 2013.
Ang bise presidente sa nasod nga si Jojo Binay mipadayag usab sa iyang minaldito nga sugyot nga mas maayo nalang kuno nga way eleksiyon sa barangay. Gusto niya nga ang mayor na ang motudlo sa kapitan ug ang kapitan na lang usab ang mopili sa iyang mga konsehal.
Bisan tuod og manugsama sila og girason nga mao ang galastuhan, apan kining ilang panagsumpaki sa petsa dili makapasolido sa ilang kampanya nga di mapahigayon ang piniliay karong tuiga.
Mahulagway nga sila igo lang namulitika kay gusto lang nilang ipataas ang termino sa ilang mga liderato.
Nganong di man sundon ug ipahigayon ang piniliay karong tuiga nga mao na man kini ang nalatid sa balaod?
Dili problema sa gobiyerno ang paggasto sa pagpahigayon sa umaabot nga piniliay sa SK ug sa barangay kay anaa na may igong gahin niini.
Ang gikahadlokan sa mga politisyan mao ang paggasto sa kampanya ug ang pagpamalit og boto aron pagsiguro sa ilang kandidato.
Kini maoy ilang problem ug dili problema sa gobiyerno. Unya, nganong i-among man ang kagustohan sa mga tawo?
Angayan lang ihinayon ang eleksiyon.