Don K. Depariene
Cebu City
SAKAY sa iyang bag-ong sakyanan, kolor itom nga Toyota Fortuner, didto sangko si Rene sa Mountain View Resort nga nahimutang sa usa ka bukirang barangay sa siyudad sa Sugbo ning gabhiona. Gusto niyang mag-inusara. May buot siyang pangitaon sulod sa iyang kaugalingon ning gabhiona. Imbes adto siya moyampungad sa Casino, nakahukom siya nga mag-inusara karon. Gani, wala siya magdala og guwapa ug seksing GRO nga sagad niyang bayran sa binandol niyang salapi, bugti sa usa ka one-night-stand nga romansa.
Human ika-parking ang sakyanan misaka si Rene ngadto sa kinaibabwan nga gilibutan sa sugang dagitabnon ang mga lingkuranan nga nag-umbaw ngadto sa tibuok talan-awon sa siyudad sa Sugbo. Pagkasanaw tan-awon ang tibuok palibot sa Sugbo gikan ning iyang gilingkuran nga naggilaw-gilaw sa nagkadaiyang sugang dagitabnon. Pagka presko hanggapon sa lab-as nga hangin sa kinaibabwan ning maong mountain resort.
Ilado kaayo si Rene sa bisan asang dagkong sugalan. Usa siya ka multi-millionaire nga negusyante. Nanag-iya siya og usa ka five-star hotel, dakong hardware store, usa ka department store ug usa ka gatos nga bus-pasheroan nga nagdagan sa habagatan ug amihanang kalungsoran sa lalawigan sa Sugbo.
“Welcome to Casino, Sir Rene Montegrande!” kanunay kini nga mosugat kaniya panahon nga mosulod siya sa sugalan.
Ning iyang pag-inusara karon, may mga tingog nga nagpahinumdom kaniya sa mga butang nga nahilambigit sa iyang kinabuhi.
“Nahigugma ka sa Diyos tungod kay hinimba ug kanunay kang nagdayeg ug nagpasalamat Kaniya. Apan dakong pakyas ang imong pagka relihiyuso tungod kay wa ka mahigugma sa imong mga silingan.”
“Wa kay pagpakabana sa mga kabos nga nagkinahanglan sa imong panabang.”
“Unta, ang dagkong kantidad sa salapi nga imong gipildi sa Casino ug bigtime derby, imong gihatag ngadto sa mga kabos nga nagkinahanglan.”
“Biyai ang bisyo mong pagka himabaye aron masalbar mo ang pagkabungkag sa imong pamilya.”
“Timan-i nga ang bahandi ning kalibutan dili madala ngadto sa gingharian sa langit.”
“Pagbag-o ug paghinulsol sa imong mga sala ngadto sa imong asawa ug mga anak.”
“Tumana ang gilangkob nga duha ka sugo sa Diyos: Higugmaa ang Diyos labaw sa tanan ug higugmaa ang imong mga silingan!”
Karon, may kalit nga kahiamgo nga nasinati ni Rene sa iyang kaugalingon. Natugkad na niya kon diin dapita siya nagkulang sa iyang kaugalingon. Nasayod na siya sa angay niyang buhaton nga maoy bunga sa halawom niyang pag-inusara ning gabhiona – ang hingpit nga pagbag-o sa iyang kinabuhi ug ang pagsunod sa mga kasugoan sa Ginuo. (KATAPUSAN)