DUHA ang nangamatay ug laing usa ang nasamdan sa pagpamusil pasado alas 3 kagahapon sa kaadlawon sa interior portion sa Barangay Tejero, dakbayan sa Sugbo.
Ang biktima nga ni-survive sa hitabo nagdudang pulis o barangay tanod ang namusil kanila.
Usa sa napatay nga wa pa mailhi sa pagsuwat ning taho gituohang police character sa pier area sa dakbayan sa Sugbo.
Ang usa sa mga biktimang namatay giila lang sa alyas nga “Jerry Libat,” kapin sa 20 anyos ang panuigon, 5’4 ang gitas-on, kasarangan ang pamanit ug panglawas, nagsul-ob og puwa nga t-shirt, blue nga short pants ug nagsul-ob og blue nga kawo.
Samtang ang laing namatay giila nga si Cristopher Pondar, 25, usa ka construction worker, taga Sityo Sarkom, Barangay Lahug, ning dakbayan samtang ang nasamdan sa iyang bukton mao ang iyang ig-agaw nga si Rolando Niñal, 20, usa ka habal-habal drayber, taga Lahug gihapon.
Pito ka mga kabhang sa mga bala sa kalibre .45 nga pistola napalgan sa kapulisan sa dapit nga nahitaboan.
Sa pasiuna nga imbes-tigasyon nga gihimo nila ni PO3 Roger Nedamo, PO3 Geofrey Gutual, PO3 Victor Ayuman ug PO2 Cristobal Geronimo sa Homicide Section kang Ninal, siya nibutyag nga didto sila sa Sityo Sampaguita kay nangita sa usa ka lalake nga giprendahan og cell phone ni Pondar.
Ilang gipangita ang maong lalake nga wa siya makaila kay bugtong si Pondar ang nakaila niini.
Nagsige sila og tuyok-tuyok sa dapit aron pagpangita niini.
Wa nila damha nga nahadungan usab kanila si Jerry Libat sa paglakaw ug naatol usab nga ilang ilang nasugatan ang pundok sa mga tawo kinsa namusil gilayon kanila.
Sila si Libat ug Pondar nangamatay diha-diha sa ilang mga samad ug nagbuy-od diha sa dalan.
Bisan pa man kon nasamdan, si Niñal nakadagan ug nakasakay og taxi ug nagpahatod sa tambalanan.
Apan sa dihang nahinabi sa mga tigbalita, si Niñal niingon nga ningduol kanila ang mga lalake nga ilang gikasugat ug nangutana kanila nga “Asa mo?” dayon nisunod ang mga buto sa armas.
Gipanghimakak ni Niñal nga ilang kauban si Libat kay igo lamang nila kini nga nadungan sa paglakaw diha sa dapit.
Usa ka tinubdan sa Sun.Star Superbalita nibutyag nga notado na ang maong dapit nga nahitaboan nga maoy daganan sa mga badlungon sa katilingban.
Apan ang mga sakop sa Homicide Section mohimo pa og dugang imbestigasyon kabahin sa hitabo aron masuta ang motibo sa pagpamusil.
Sa pagkakaron, “blank wall” pa ang kapulisan sa ilang imbestigasyon, pag-ila sa mga killer.
Nahibudngan usab sa kapulisan nga atol sa ilang pag-responde, way ni bisan usa ka barangay tanod sa Tejero nga nitubag usab sa alarma nga unta ila man kining balwarte.