USA ka suspetsado sa pagpanglugos ang nasikop niadtong Martes mga alas 5:30 sa hapon sulod sa merkado sa Cogon ning siyudad sa Cagayan de Oro.
Nasikop si Nelson M. Quiring, minyo, taga Binigwagan, lungsod sa Alubijid, Misamis Oriental pinaagi sa warrant of arrest.
Si Police Officer 2 Alex La Serna sa Alubijid Police Station nibutyag sa Sun.Star Superbalita nga nakig-coordinate sila sa kapolisan sa Police Station 2 (PS2) sa Cogon ning siyudad human nahibaloan nga sa siyudad nagtago-tago ang suspetsado.
Gikasohan si Quiring human gitumbok nga nilugos sa 13 anyos nga babaye nga silingan ra usab niini sa Barangay Lagtang, Alubijid.
Giingong gihaylo sa suspetsado og kwarta ang maong biktima pipila na ka bulan ang nilabay.
Mireklamo ang pamilya sa minor human nangayo ug tabang tungod sa kasakit nga
gibati. Nisibat ang suspetsado human nasayod nga gipasakaan siya og kaso.
Positibo usab nga gilugos ang biktima base sa migawas nga resulta medical examination.
Ang arrest warrant gipirmahan ni Judge Dennis Z. Alcanter kinsa acting presiding judge sa 10th Judicial Region Branch 44 sa lungsod sa Initao. Walay piyansa nga
girekomenda lang sa temporaryo nga kagawasan sa suspetsado.
Dugang ni La Serna nga nga taod taod na nga gipangita sa kapolisan sa Alubijid ang suspek ug gidayeg usab ang kooperasyon nga gihatag sa kapolisan sa PS2.
Sa pagsulat ning balita, gibalhog na sa prisuhan ang suspetsado nga gitakdang dad-on sa Misamis Oriental Provincial Jail (MOPJ). (Stephanie V. Berganio)