KINING naghinapos ang semana partikular sa petsa 22 sa Agusto mao ang ika-25 ka tuig nga kapistahan sa Kadayawan sa dakbayan sa Dabaw. Ang usa sa mga labing dako nga selebrasyon ning dakbayan matag tuig.

Ang kadayawan giilang mas dako pa nga kalihukan sa siyudad kon itandi sa nibersaryo sa pagka-siyudad niini.

Updates on President Benigno Aquino III's presidency

Nganong nahimo kining mas gipangandaman sa kagamhanan ug sa pribadong sektor nga selebrasyon sa tibuok tuig? Kini tungod kay daghan og posibleng kahulogan nga ikonsiderar sa mga tig-organisar ilabina kay kini mao ang pagpasalamat sa abot nga nakuha sa atong mga mag-uuma. Kini usab nga okasyon kay ting-ani man, may ikapasundayag gayud ang matag hut-ong sa katilingban ilabina sa agrikultura.

Kung agrikultura usab ang atong hisgutan, dili mapalayo ang hulagway sa atong mga lumadnong kinabuhi, ug dayag nga madala ang kultura diha sa napulo ka tribo nga nia sa Dabaw.

Ang trabaho karon sa mga gitawag nga bisaya mao ang pag-atiman sa kaliwat ug maoy manalipod sa kultura hangtud nga ikabilin nato sa umaabot.

Gihimo kini nato aron dili malimtan kon unsa ang gigikanan sa mga tawo dinhi sa Dabaw nga mao ang naghatag kanato og dungog ug bahandi nga atong gipahimuslan karon. Ug aron kana mahinumduman gipasidunggan nato ang Kahitas-an sa maayong klima ug ang maayong abot.

Apan sayod ko nga karong tuiga dunay grupo nga nagbagotbot kay wala maila ang ilang paningkamot sukad pa kaniadto aron labi pang masadya-on ang kasaulogan sa Kadayawan.

Sama pananglitan sa mga lomulopyo sa Bankerohan nga kanunay nilang gipakita mao ang kinabuhi sa daplin sa suba ilabina sa makasaysayong Davao River.

Sanglit mipadayag og dakong suporta si Kapitan Edgar Ibuyan Jr., sa maong selebrasyon, apan dili gayud matago ang iyang pagbagulbol kay wala na sila mahilakip sa mga programa nga naandang nakalinya sama niini nga kalihukan.

Matag Kadayawan, ang Barangay 5-A mao ang nagakapasiugda sa floral float parade, apan natingala na lamang sila nga dili na kini mahitabo karon.

Wala tay matumbok kon kinsa ang mipapas (erase) sa listahan sa maong kalihukan sanglit naandan na sa katawhan ang pagtan-aw sa lumadnong pagdayan-dayan sa mga klase sa bangka nga simbolo sa mga tribo nga nabuhi sa daplin sa suba sa Dabaw.

Apan bisan og wala kini, "the show must go on" ug ihatag nato ang atong kooperasyon labi na sa liderato sa atong bag-o ug batan-ong alkalde Inday Sara Duterte.

Alang sa imong sugyot ug komentaryo mamahimo kang mosuwat sa email ad: amcorphil.leo@gmil.com. Mabati usab ko ninyo sa dxRD, 711 kHz, sa tulumanong dxRD commando 711, matag alas 6:00 hangtud alas 8:00 sa buntag kada adlaw (walay labot sa Dominggo).