USA ka lalaki nadala sa ospital human gitigbas sa iyang kainom didto sa Purok 2-B Sto. Nino, Barangay Poblacion, lungsod sa Montevista, Comval Province, Lunes sa gabii.
Giila ang biktima nga mao si Jonebel Calipan, 18, ug molupyo sa susamang dapit. Samtang ang suspek, sa laing bahin, nailhan nga mao si Janel Goc-ong, 22.
Sa report nga nahagpat gikan sa Comval Province Police Provincial Office, nasayran nga pasado alas 11:00 sa gabii, nag-inom ang biktima ug ang suspek sa usa ka imnanan sa maong lugar, apan nagkalalis ang duha human nalango na sa makahubog nga ilimnon.
Ang nahisgutang lalis miinit ug misangko sa pagtigbas sa suspek ngadto sa biktima gamit ang sundang.
Nasamad ang ulo sa biktima sa maong hitabo ug dali siyang gidala sa iyang mga silingan ngadto sa Davao Regional Hospital sa siyudad sa Tagum.
Ang suspek nasikop sab dayon sa mga miresponding sakop sa barangay tanod sa nahisgutang dapit.
Gidala dayon sa presinto sa kapulisan ang suspek ug gitanggong sulod sa selda samtang giandam na ang kaso batok kaniya.
Kapulisan sa lungsod sa Montevista mihimo na og dugang imbestigasyon sa nahisgutang hitabo. (Marvin Pineda)