WALA pay matudlo ang kapulisan nga mga suspek sa pagpusil patay sa barangay kapitan ug sa usa ka principal didto sa lungsod sa Kiblawan, Davao del Sur.
Nagpabiling gawasnon pa karong panahona ang mga mamumuno sa duha ka mga managkabuwag nga pagpamusil sa maong probinsiya.
Unang gipusil patay si Ananias Pelletero, 45 anyos, minyo, ug barangay kapitan sa Sto. Nino, Kiblawan, samtang pauli na unta siya sa ilang balay banda alas 12:45 niadtong Agosto 11.
Subay sa imbestigasyon, sakay sa iyang motorsiklo ang biktima sa dihang gipusil patay sa Purok 3, Sulop, Davao del Sur sa duha ka mga lalaki nga nakamotorsiklo.
Daling gidala sa balay-tambalanan ang biktima apan gideklara nga "dead on arrival" sa mga mananambal.
Nahiagom ang biktima og ubay-ubay nga mga samad-pinusilan sa ulo ug lawas hinungdan sa iyang hinanaling kamatayon.
Matud pa sa asawa niini, buotan nga opisyal ang iyang bana mao nga siya nagtuo nga bahin sa politika ang motibo sa krimen.
Samtang gipusil sab patay ang public school principal sa Isabelo Calma Elementary School sa Barangay Balasioa, Kiblawan.
Si Arielito Margate, 33, ug taga Barangay Poblacion sa maong lugar, wa na makatambong sa seminar didto sa Nakayama Convention Center sa siyudad sa Digos human siya gitipi sa wala mailhing suspek nga nakasakay og motor. Igo lang giparada sa biktima ang iyang motorsiklo atubangan sa lugar kon diin himuon ang seminar sa dihang nahitabo ang insidente.
Gisubay sa kapulisan ang anggulo nga dunay kalabutan sa gugma ang pagpatay sa biktima.
Nasayran sa Sun.Star SuperBalita, gikan kang Police Senior Superintendent Ronald de la Rosa, Davao del Sur police provincial director, nga sa ilang imbestigasyon dugay na nga nakadawat og hulga sa iyang kinabuhi ang principal gumikan sa pagpakigpuyo niini sa usa ka dalaga nga dunay ka relasyon nga taga Department of Public Works and Highways (DPWH).
Sumala kay dela Rosa nga ang nahisgutan nga anggulo mao ang ilang ginasundan hangtud nga mahatagan og sulbad ang krimen.
Wa pay bisan usa sa mga kriminal ang nasikop sa kapulisan human gimugna ang Task Force God (Government Officials of Davao del Sur) sa tumong nga matutukan ang krimen.
Si Davao del Sur Governor Douglas Cagas nagsugyot sab sa Sangguniang Panlalawigan (SP) nga moduso og ordinansa aron i-ban ang pagbaligya, pagsul-ob og bonnet sa mga de-motorsiklo. Gihimo matud pang takuban sa mga kriminal ang pagsul-ob sa bonnet aron nga di sila mailhan.
Nag-abot na ang mga kasong sulbaronon sa kapulisan human gipamusil patay sab ang usa ka babaye ug lalaki didto sa dakbayan.
Pinakaunang gipatay di pa lang dugay ang maglive-in partner nga pulos empleyado sa Provincial Engineer's Office. Nagtuo ang katawhan nga nia lang sa probinsiya ang mga gun for hire syndicate kinsa way balatian nga mopatay aron lang makasapi. (SuperBalita)