MIBALIK na sa tagsa-tagsa nila ka mga panimalay ang mga pamilya nga biktima sa baha didto sa lungsod sa Sulop, Davao del Sur.

Kahinumdoman nga niadtong adlawng Dominggo, namakwit ang 29 ka pamilya human gibaha ang Barangay Poblacion sa maong lungsod.

Updates on President Benigno Aquino III's presidency

Si Juanita Tuong, nagkapuliki pagpanglimpyo sa mga lapok nga nisulod sa ilang balay uban sa iyang mga anak.

"Igo na lang nako gihikap ang mga gamit nga grabeng naguba," matud pa ni Tuong.

Pista sa lungsod niadtong Lunes, apan wa na makalipay-lipay ang katawhan sa pag -selebrar gumikan sa nahitabong kalamidad.

Wala nay makitang bisan usa ka bakwit sa municipal gymnasium human namauli ang mga tawo.

Gawas sa pagbaha nahitabo sab ang landslide sa mga Barangay Waterfall ug Kiblogan.

Walay namatay o nasamdan sa nahitabo apan maglisod pa pag-agi ang mga motorista sa dalan tungod sa mga nagkatag nga mga bato ug mga kahoy nga natumba sa kalsada.

Subay sa rekord sa munisipyo, tuig 2007 pa sila nakasinati og ingon niini nga kalamidad human nga nangaopaw na ang bukid tungod sa paghimo og uling sa mga tawo gamit ang kahoy.

Si Mayor Jose Jimmy Sagarino nagpasusi na sa taho nga adunay buhawing nahagbong sa bukid aron masayran ang hinungdan sa kusog nga pagbaha.

Adunay tulo ka main drainage system sa ilang lungsod apan di makasugakod ugaling kusog na kaayo ang bul-og sa tubig mao nga gi-plano karon sa lokal nga gobyerno nga magbutang na lamang og tulay kun "viaduct" ibabaw sa kalsada aron sayon rang makalapos ang tubig.

Nagpasalamat na lamang ang mayor nga way kinabuhing nakalas sa kalamidad ug gi-awhag niya karon ang katawhan nga magtimabangay sa pagpananom og mga kahoy. (Dondon Dinoy)