NAMATAY sud sa tambalanan ang usa ka 73 anyos nga tiguwang babaye human siya nabanggaan og sakyanan samtang mitabok sa kalsada sa alas 6:30 sa gabii niadtong Martes.
Ang insidente nahitabo atubangan sa Seaoil Gasoline Station, Diversion Road, Diho Subdivision, Buhangin, siyudad sa Davao.
Base sa blotter sa Buhangin Police Station, ang biktima mao si Peregrina Loganio, 73, ug nagpuyo sa Blk. 2, Lot 5, Ciudad De Esperanza, Barangay Cabantian.
Si Loganio giingon nga namatay human siya nabanggaan sa SUV Pick-up nga dunay plate number YGG-174 nga gimaneho ni Evan Sy Lagrata, 37, minyo ug nagpuyo sa Mangga Street, Christ the King Village, Bagbagin, Valenzuela City.
Nasayran nga gikan ang SUV sa Buhangin Proper paingon sa Panacan apan dihang miabot sa Seaoil Gasoline Station nabanggaan si Loganio.
Ang biktima maayong pagkatumba sa kalsada, hinungdan nga nakaangkon og daghang bun-og sa kalawasan. Siya daling gidala sa Southern Philippines Medical Center (PMC).
Pipila ka oras samtang giatiman sa mga doktor ang biktima, giingon nga nakabasan sa kinabuhi ang tiguwang tungod kay grabe ang ilang mga bun-og sa kalawasan.
Ang drayber uban sa iyang sakyanan atua gikostudiya sa kapulisan sa Buhangin samtang gihikay ang kasong reckless imprudence resulting to homicide. (AD)