SA GIHIMONG pagpanghulga sa Moro Islamic Liberation Front nga andam na sila karon alang sa armadong pakigbisog alang sa gimithing kagawasan kon ugaling dili sila pamation ug hatagan og importansya sa mga bag-ong nangatungdanan ubos sa liderato ni Presidenti Noynoy Aquino. Dali kaayong nakatubag ang gitudlong Chief Negotiator nga si Marvic Leonen nga abli sila karon sa posibilidad nga usbon ang Batakang Balaod aron sa katapusan mahuman na kining maong dugay na kaayong panagsungi tali sa gobyerno ug sa MILF.

Updates on President Benigno Aquino III's presidency

Tungod niini, si House of Representatives Committee Chairman on National Defense Rodulfo Pong Biazon, sa dihang atong ekslusibong nahinabi sa Tulumanong Alagad sa dyRF Radyo Fuerza ang namahayag nga lahap ra kaayo kining maong gipadayag nga baruganan ni Leonen kay gani ang katungdanan sa paghimo og inisyatibo og bisan unsang kausaban sa Konstitusyon ila man sa Kongreso og dili mamahimo ang unilateral act of the Executive Department.

Iya usab nga gidugang nga human gidesisyunan sa Korte Suprema kining maong kaso sa administrasyon pa ni kanhi Presidenti Gloria Macapagal Arroyo nga dili mahimo ang paghatag og ancestral domain ngadto sa MILF kay gawas nga dili lang ang mga Muslim ang adunay katungod nga angay irespeto kay anaa man sab ang mga lumad nga mas una pa ganing nanimuyo sa isla sa Mindanao.

Kini moresulta pud sa dakong kagubot kay magsumbagay man unya ang bag-ong mobarog nga gobyerno ug ang mga property owners nga maoy gipasikaran sa ilang katungod ang Torren certificate of title system. Gawas pa, kini moresulta pa sa posibleng paghatag og tipik sa atong teritoryo sa bag-ong nasud nga Bangsamoro nga maka-apektar sa mga lugar nga anaa sa Mindanao apan ang kinabag-an sa populasyon mga Kristiyanos ug dili mga Muslim.

Dili man usab mamahimong palayasun sila sa ilang mga yutang ilang gikabuhian unya irrelocate nalang sa Kabisay-an ug Mindanao. Hinungdan nga kun ang tingog og katungod ning mao unyang mga Kristiyanos ang dili sab mapamati. Susama sa mga muslim ang dili usab unya kalikayan nga mo-alsa og pusil aron usab kapanalipdan ang ilang panginabuhian sa ilang pamilya ug kaliwatan. Dinhi imbis kalinaw ang atong makab-ot, simbako mas mograbe pa unya ang kagubot ug ang pagbanaw sa dugo sa yuta nga gisaad.

Dili madali ang paghimo og solusyon ning maong problema kay lawom naman kaayo ang samad nga nagsukad pa sa pila na ka henerasyon panahon pa sa mga Katsila nga maoy gigamit sa pakigubat ang mga Kristiyanong Pilipino batok sa mga Muslim nga Pilipino.

Ang mga napatyan pulos naghambin og kayugot ug kalagot sa ilang mga dughan, mao nga hangtud karon ang pagbati ug pag-ila sa matag usa puros gyud mga mortal nga managkontra.