KON katuyo-an lang ang hisgutan, way makalalis kon nganong angayan lang gyud nga suportahan ang Sangguniang Kabataan.
Sila ang paglaom sa nasod ug dayan na lang angayan lang sab nga giyahan sa mga maayong binuhatan.
Sila ang magdala sa tingog sa kabantan-onan ug sa mga bulawanong panglantaw sa kinatibuk-an ngadto sa konseho o sa hunta probinsiya. Apan kining maong katuyo-an, ingon og sa nahulipan sa mga binuang.
Ang ilang kabatan-on ug kakuwang sa kaalam gipahimuslan sa mga oportunistang politisyan. Imbis ang katarong maoy ipahaom, tinunto na hinuon maoy gipasuon aron kini makatabang nga ang ilang kaugalingong interes mapalig-on.
Dili tanan, apan labing siguro kadaghanan nga ang naglingkod isip presidente sa SK o chairman sa federation adunay anino sa pulitiko.
Kon dili kaliwat o anak sa mayor, mahimong sa gobernador, kongresista o ba kaha anak sa tawo sa impluwensiyadong pulitiko. Dili kaayo makatambong sa matag sesyon kay lagi ang prayoridad mao man ang edukasyon. Dili usab mabadlong kay nakasandig man sab og pulitikong lig-on.
Niini, nakawang lang ang boto sa mga batan-on kay dili epektibo ang ila untang gitugyanan nga modala sa ilang tingog. Kuwang sa serbisyo, apan sakto sa honorarium.
Ang pundo nga gigahin unta alang sa ilang kaugalingong proyekto, posibling ihapak na lang sa laing katuyoan.
Busa unsa pa may gamit sa atong SK karon nga sa mga beteranong pulitiko sila ra man ang gipahimuslan? Unsa man kahay ilang makat-onan ilabi na ubos sa kurakot nga kadagkuan?
Ang mga kabatan-onan dili angay isugnod sa kadautan, luwason ug ipalayo sa mga kabuang.