GIPANGRELIBUHAN ang tanang mga guwardiya sa Maghaway Detention and Rehabilitation Center (MDRC) sa Maghaway, Talisay City human malampuson nga nakapuga ang usa ka menor de edad nga priso niadtong Hulyo 20.

Hangtod karon pakyas ang paningkamot sa mga jail guard sa pagsikop pagbalik sa 16-anyos nga dunay kasong pangawat.

Updates on President Benigno Aquino III's presidency

Ang regional office sa Bureau of Jail Management and Penology (BJMP) nigahin og P13,000 nga patong alang sa makatabang sa pagsikop pagbalik sa pugante.

Si Chief Inspector Renante Rubio, ang bag-ong warden sa city jail, nibutyag nga ila nang giadto ang address sa batan-on sa Deca Homes sa lungsod sa Minglanilla, Cebu apan wa na kini mauli didto.

Giingong lumad sa kaulohan ang maong piniriso apan niabot dinhi sa Sugbo ug nalambigit sa mga kawat.

Kahinumdoman nga ang suspek nakasibat pinaagi sa pagbuslot sa payagpayag nga maoy gibilanguan kaniya ug nakalusot sa ikaduha nga gate nga wa mabantayi sanglit kusog ang uwan niadtong higayona.