NAG-UMOL og task force si Gobernador Hilario Davide III nga maoy moatiman sa pagpalambo sa Cebu Provincial Detention and Rehabilitation Center gumikan sa sunodsunod nga panghitabo.
Kini, samtang gitudlo sa gobernador si Bobby Legaspi, pangu sa Civil Security Unit, nga temporaryo mohulip sa mi-resign nga acting warden sa provincial jail nga si Romeo Manansala.
Si Manansala kutob na lang kagahapon sa CPDRC ug adto na madestino sa CSU.
Pinaagi sa Executive Order No. 10 nga giluwatan niadtong Agusto 16, 2016, si Davide nagtukod sa Task Force CPDRC.
Kini langkuban nila ni Davide isip maoy chairman, ug mga miyembro nga sila si Provincial Administrator Mark Tolentino, Legaspi, Provincial General Services Office head Jone Sepe ug Human Resources Management Office head Bonifer Nacorda.
Si Provincial Information Office Jason Monteclar niingon nga kon gikinahanglan, maapil usab sa task force ang nagkalainlaing department heads ug consultants sa Kapitolyo ug ubang mga ahensiya sa gobiyerno.