NIHINAY-HINAY na gayud ug gawas ang kamatuuran batok niining modus operandi sa mga ginsakpan sa kapolisan nga nalambigit sa gitawag nga "Hulidap". Bag-o pa lamang mitumaw ang reklamo ni Asst. City Prosecutor Rodrigo Talledo Sr. basi sa iyang sulat nga gipadala kang City Police Director Col. Isagani Lopez nga kalit sa dayon mihimo ug bakwi sa kasong ilang gipasaka batok sa usa ka giilang drug pusher nga si Emilo Baconga sa Barangay Lapasan.

Sumala sa mga pagduda nga adunay nahitabong "cashabutan" tali sa mga giilang arresting officers nga sila si Police Officers (PO) 2 Lodigario Sagun, Raymund Seno, Rustom Genis ug PO3 Joel Deloso ug ang dinakpan.

Unsa may nakaon niining mga manghak nga ilang kalit gibakwi ang ilang sinumpaang salaysay sa kasong pagsupak sa Section 5 Article 11 nga giilang Comprehensive Dangerous Drugs Act of 2002 batok ni Baconga nga usa man unta kini ka heinous crime?

Dili ikalimod nga pipila ka mga sakop sa PNP nga niaresto niining giilang mga drug pushers dili na mopadayon sa pagpasaka ug kaso batok sa dinakpan o dili na mutunga sa hearing sa kaso aron dayag nga ma-dismiss, human sa sekretong binayranany tali sa polis ug dinakpan.

Kasagaran pangayuon sa negosasyon nagsumikad sa kantidad P50 mil ngadto na sa P200 mil, depende unya sa gimbug-aton sa kasong giatubang sa akusado. Kung nahimo kini sa mga junior officers sa PNP, unsa kaha usab ang nagkadaiyang diskarte sa pipila ka notadong kurakot nga opisyal niini?

Daku kaayo ang akong pagdayeg ni Asst. City Prosecutor Talledo Sr. sa iyang hugot ug seryosong pagpakabana labi na ang pagsumpo niining seryosong prublema sa pagpayuhot sa druga dinhi sa atong dapit. Angayan hatagan ug tiunayng komendasyon ang susama niini nga mga opisyal sa buhatan sa Piskaliya nga sinsero gayud mopatigbabaw sa hustisya.Ang Cagayan de Oro Press Club pinaagi ni President Atty. Bobby Goking, saludo kaayo sa katakus ni Fiscal Talledo Sr.

Lakip usab nato nga gidayeg ang walay puas nga kampanya sa PDEA ubos ni Ret. Lt. Col. Edwin Layese, PDEA Regional Director, sa maayong performance niini sa kampanya batok druga.Ako lamang panawagan usab sa PDEA Director nga imonitor kining pipila ka pulitiko nga nalambigit sa druga ug kabahin sa nagka grabe karon nga "Narco Politics" sa rehiyon.

Pagkamakauulaw ba gayud sa imahe sa Cagayan de Oro Police Office kun COCPO sa gihimo niining 4 ka iresponsableng tigpatuman unta sa balaod. Siguro, kining mga tawhana wala gayud sa ilang huna-huna ang pagserbisyo kun dili unsaon nila nga makasapi bugti sa ilang pagka otoridad.

Wala kita masayop sa atong mga panglantaw basi sa gihimo ta nga mga expose batok sa polis "hulidap" labi na sa COCPO. Dili lamang igo ang pagpahigayon sa lahugay kun sa panahon adunay masakpan nga sakop sa PNP nga nalambigit sa hinangal sa ilang panerbisyo.Gikinahanglan gayud nga palagputon kining giilang "kotong cops" dili lamang sa kampanya sa druga, apil usab ang kinatibuk-an.

Hinaot pa unta.

Kadtong mahilig sa kalipayan nga walay kinutuban, hala bira 288r, 542r, 801r, 548r (2 p.m., 5 p.m., 9 p.m.). Sabta ninyo nga ang dulang swertres is not a game of chance, but a game of syndicate. Atangi ninyo ang pagbalik sa programang Todo Banat sa radyo uban ni Banat Jonas Ubagan Bustamante sugod Sept. 8, 2010 sa mas kusog ug tin-aw nga sibyahan sa FM station.