USA ka piniriso ang nilanding sa balay tambalanan human nakuryenti niadtong Miyerkules mga alas 3:40 sa hapon sulod sa prisuhan sa Misamis Oriental Provincial Jail (MOPJ) ning siyudad sa Cagayan de Oro.

Si Apolinaria Alimao, ang giingong gikan sa comfort room sa maong prisohan apan paggawas niini kalit lang nga nakahawid sa poste nga puthaw nga nay kuryente hinungdan sa pagkirig niini.

Maayo na lamang kay nakapangayo og tabang ang biktima hinungdan nga gidali usab pagpalong sa mga jail officer ang plangka.

Gibati og kakapoy sa lawas ang biktima ug nasunog ang wala nga bahin sa mga tudlo niini hinungdan nga gidali pagdala sa Northern Mindanao Medical Center (NMMC).

Hinuon sa pagsulat ning balita luwas na sa makuyawng kahimtang si Alimao ug nakagawas na sa balay tambalananan nga gibalik ra usab pagbalhog sa prisuhan. (SVB)