PIPILA sa mga ginikanan ang nireklamo nga gipa-amot og P5 aron itabang sa tinun-an nga nadisgrasya human nabuak ang toilet bowl sa pansayan sa City Central School.
Hinuon dunay nga ginikanan nga kinasing-kasing nga nitabang.
Usa ka inahan kinsa dili magpaila ang niyawyaw dihang nahinabi sa Sun.Star Superbalita nga nakaamot siya og P25 pesos tungod kay lima man ang anak niini nga nagtungha sa tunghaan ug giingong gipangayoan sa maestra agi'g tabang sa usa ka tinun-an sa Grade 3 nga mao si Ruth Angela Cunanan, kinsa samaran human nabuak ang toilet bowl sulod sa classroom niini niadtong Lunes.
Nasayran nga matag bata sa maong tunghaan gipangayoan og tag P5.00 aron i-ayuda ngadto kang Cunanan nga na-ospital sa Polymedic General Hospital human sa insidente.
Pipila man sa mga inahan ang nagyawyaw nga nakabayad apan daghan sa mga ginikanan ang kinasing-kasing nga naghatag aron itabang.
"Sus, pila raman sab nang singko nga louy man sab ang bata ug kabalo man ta nga makatabang pag-ayo," ni Joana nga nahinabi usab sa Sun.Star Superbalita. Gani nagpasalamat na lang kini nga dili ang iyang anak ang nadisgrasya.
Gipasabot usab niini nga wala man usab gipugos ang mga bata nga mo-amot sa maong kantidad ug masabtan man kung walay ikahatag.
Nisuway sa pagpangayo og pamahayag ang Sun.Star Superbalita sa pipila ka personahe sa maong tunghaan kalabot niini apan nidumili sa paghatag og pamahayag.
Kahinunduman nga daghan ang nakurat sa insidente human samaran ang 9 anyos nga si Cunanan.
Gani ang School principal nga mao si Sheryl A. Merida, niadtong tungora niingon nga aksidente lamang ang hitabo labina nga taod-taod na ang pipila ka mga gamit tungod sa kakulangan usab sa budget.
"This is the first incident of its kind that happened in our school. But I guess, this will serve as a warning that basic infrastructures must be upgraded immediately before another incident will happen," ni Merida. (Stephanie V. Berganio)