PROBLEMADO ang usa ka babaye human nawad-an og kapin P400 mil samtang nangaon sa usa ka fasfood chain sa Limketkai Mall ning siyudad sa Cagayan de Oro.
Si Raga M. Cadalay, 65, bulag sa asawa, lumad nga taga siyudad sa Marawi uban sa iyang anak nga si Rachel M. Bacamaran, minyo, taga Barra, Macabalan ning siyudad ang nangaon niadtong Miyerkules mga alas 2:30 sa hapon.
Dala ni Cadalay ang iyang hand bag nga kolor brown nga adunay sulod P400 mil nga gikan pa gi-loan sa bangko aron isugod og negosyo sa Marawi.
Lakip nga sulod sa bag ang nagkalain-laing alahas nga mokantidad tanan og P12 mil, mga yabe ug mga importanteng dokumento.
Si SPO3 Heracleo Babanto sa Police Station 2 (PS2) sa Cogon nibutyag sa Sun.Star Superbalita nga gibutang ni Cadalay ang iyang bag tupad niini ug sa salog nga bahin.
Namatikdan lamang ang usa ka lalaking niduol apan wala gitagad sa pagtuong kostumer gihapon ug uwahi na dihang namatikdan nga wala na ang bag niini ug gibitbit na sa lalaki.
Gipasabot ni Babanto nga "tempo" ang tawag sa modus operandi nga susama niini diin kalit lang ang panghitabo apan nakuha na dayon ang tinguha sa suspek.
Kasagaran sa mga suspek niini dili mahibaw-an kung giunsa pagkuha ang bag ug gihulagway niini nga mga abtik kaayo ug anad na sa modus nga susama niini.
Nasayran nga kini ang unang kaso sa "tempo" nga nahitabo sa area sa Cogon ug giimbestigahan uban sa mga sakop sa City Intelligence and Detective Unit (Cidu) ning panahona labina nga gisulti sa mga biktima nga ilang maila ang suspetsado panahon nga ilang makita. (Stephanie V. Berganio)