USA ka kanhi opisyal sa Armed Forces of the Philippines (AFP) ang gipusil patay sa alas 10:20 sa buntag niadtong Miyerkules didto sa siyudad sa Cotabato.
Giila sa kapulisan ang biktima nga si kanhi 1Lt. Michael Paura, 56, minyo, retiradong sakop sa Philippine Army ug molupyo sa Masiu, Lanao del Sur.
Gibutyag ni Cotabato City Police Director SSupt. Willie Dangane nga samtang padung sa paggawas ang biktima sa bay sa iyang paryente sa Purok Narra, Mabini Extension, Mother Barangay Bagua, kalit nga dunay mibutho nga duha ka wala mailhing mga tawo ug gipusil siya gamit ang kalibre .45 nga pistola.
Patay gilayon si Paura nga nasamdan sa iyang dughan ug ulo samtang ang mga mamumuno misibat sakay sa motorsiklo.
Hangtud karon blangko pa ang mga otoridad sa motibo sa pagpatay sa maong opisyal sa militar ug padayon pa silang naniid sa mga tawo nga posibling dunay kalabutan sa krimen.
Si Cotabato City Mayor Japal Guiani, napikal na sa kapulisan gumikan sa sunod sunod nga pagpamatay nga nahitabo sa dakbayan. (Edgardo Fuerzas)