USA ka ex-convict gipusil patay sa wa mailhing mga tawo nga nagsakay og motorsiklo didto sa Purok Rosal, Rabi Compound, Barangay Visayan Village, siyudad sa Tagum, pasado alas 7:11 sa gabii niadtong Miyerkules.

Nailhan ang biktima nga mao si Vincent Palas, 35, usa ka pintor, ug molupyo sa susamang dapit.

Sumala sa report gikan sa Tagum City Police Station nga samtang nagbaktas si Palas gikan sa usa ka tindahan pauli na unta sa iyang balay, kalit miduol kaniya ang wa mailhing mga lalaki nga nagsakay og motor ug gipusil gamit ang wa pa matinong kalibre sa armas makadaghang higayon.

Nakadagan pa unta si Palas apan gigukod siya sa mga suspek ug pag-abot atbang sa balay sa pamilyang Iligan naapsan siya ug gitiwasan og pusil.

Natusak-tusak sa mga bala ang lawas sa biktima hinungdan sa iyang hinanali nga kamatayon.

Mga suspek dayong misibat padulong sa wa matino nga lugar human sa pagpamusil sakay sa motorsiklo.

Ang biktima kanhi napriso tungod sa kasong robbery sa siyudad sa Tagum.

Ang kapulisan mihimo na og dugang imbistigasyon sa hitabo.

Gitan-aw sab sa mga otoridad kung ang kanhi kaso sa biktima duna bay kalabutan sa pagpatay kaniya. (Marvin Pineda)