USA ka menor de edad nga lalaki gipusil sa wa mailhing mga suspek didto sa Barangay Magcagong, lungsod sa Maragusan, Comval Province, Miyerkules sa kaadlawon.
Nailhan ang biktima nga mao si alyas Aljun, 15, ug molupyo sa Barangay Bagong Silang, lungsod sa Maragusan.
Sa report gikan sa Comval Province Police Provincial Office nasayran nga pasado alas 3:00 sa kaadlawon, nagbarog lamang ang biktima sa nahisgutang lugar, dihang kalit siyang gipusil sa wa mailhing mga suspek gamit ang wa pa matinong kalibre sa armas.
Naigo si alyas Aljun sa iyang tuong batiis ug gidala pagdali sa Maragusan Municipal Hospital.
Apan tungod sa grabing samad nga nahiaguman sa biktima gibalhin siya sa Davao Regional Hospital sa siyudad sa Tagum.
Mga suspek dayon sab nga misibat padulong sa wa matino nga lugar human sa pagpamusil.
Narekober sa kapulisan ang usa ka kutsilyo nga dunay gitas-on nga 10 ka pulgada ug usa ka indian pana gikan sa posisyon sa biktima.
Kapulisan sa lungsod sa Maragusan mihimo na og dugang pakisusi sa hitabo. (Marvin Pineda)