DUHA ka mga tawo ang namatay human sila gipamusil sa duha ka wa mailhing mamumuno samtang nag-inom sa alas 7:30 sa gabii niadtong Miyerkules.

Ang insidente nahitabo sa Balot Vulcanizing Shop didto sa Purok 38, Diversion Road, Barangay Maa, siyudad sa Davao.

Mga biktima mao sila Ranel Bargamento, 33, minyo, empleyado sa City Environment and Natural Resources (Cenro), nagpuyo sa Purok 38 ug Willy Amador, alyas Wisely Amador, 44, panday ug napuyo sa Maharlika Village, Barangay Maa.

Si SPO4 Policarpio Ballenas sa Talomo Police Station nagbutyag sa iyang spot report nga malipayon kaayong nag-inom ang mga biktima sa Balot Vulcanizing Shop apan nasanta dihang miabot ang duha ka mga tawo nga nagsakay og motorsiklo.

Matud ni Ballenas nga ang duha ka mga tawo miduol sa nahimutangan sa mga biktima dayon gipamusil sila sa makadaghan nga higayon gamit ang .45 kalibre nga pistola.

Sila Bargamento ug Amador giingon nga naigo sa ilang ulo hinungdan sa ilang kamatayon samtang ang mga mamumuno daling misakay sa ilang Yamaha DT 125 nga way plate number nga motorsiklo.

Samtang nagbuy-od ang mga biktima, suma sa mga nakasaksi, daling nahanaw ang mga killers gikan sa crime scene.

Mga sakop sa Scene of the Crime Operatives (Soco) nakahipus og onse ka basiyo sa bala sa armas nga gigamit sa mga mamumuno.

Ang patay'ng lawas sa mga biktima atua karon gihaya sa Angel Funeral Homes.

Si Davao City Police Office (DCPO) director Rene Aspera nagbutyag sa Superbalita nga ila karong gisusi ang tanang anggulo sa krimen aron sayron kung kinsa ang mga tawo nga mipatay sa mga biktima.

"So far, may nakuha na witness ang Criminal Investigation and Detection Group (CIDG) at kami naman sa DCPO nag-investigate sa immediate family ng mga victims," ni Aspera kagahapon sa Superbalita.

Si Aspera nagkanayon nga ilang paningkamotan nga mahipus ang importanteng mga detalye sa krimen aron masulbad ang kamatayon sa duha.

"Kailangan namin ang vital information para matukoy namin ang mga suspects. Kung magkatugma ang statement ng family at ng witness, that is the time na i-file namin ang kaso sa mga lumabas na suspects," dason ni Aspera.

Si Bargamento maoy labing uwahing empleyado sa Cenro nga gipusil sa wa mailhing mga tawo.

Niadtong Agosto 12, gipusil si Cristituto Marindoque, 35, minyo, garbage collector ug nagpuyo sa Purok Tinago, Barangay Matina Crossing.

Si Marindoque gitambalan karon sa Southern Philippines Medical Center (SPMC) human siya gipusil kauban si Enrique Santiago, 38, minyo, salesman sa Oliver Industrial Company ug nagpuyo sa St. Joseph the Worker, Purok Tinago.

Si Santiago namatay human sila gipamusil samtang nag-inom sa Campos Store, San Isidro, Purok Tinago.

Sa maong mga pagpamusil, wa pa gihapon masayri sa kapulisan ang motibo sa mga mamumuno kinsa managsama og pamaagi ug armas nga gigamit sa pagpatay sa mga biktima.

"Hindi pa namin ma-establish ang motive ng mga suspects kaya tinitingnan naming ang personal back ground ng mga victims," pahayag ni Aspera.

Makaalarma

Ang sunod-sunod nga pagpamusil nakapaalarma na sa Commission on Human Rights (CHR) sanglit kapin napulo na ka mga tawo ang gipamatay sukad sa katapusan sa Hulyo hangtud ning semana sa Agosto.

"I already ordered my station commanders to investigate and solve the case baka ipatawag na ang aming attention ng CHR," pahayag ni Aspera dihang gipangutana kung unsa ang iyang mando bahin sa sunod-sunod nga pagpamatay.

Si Aspera nagkanayon nga di pa nila masulti kung ang mga pagpamusil sa siyudad binuhatan ba sa mga vigilante.

"Sa ngayon, hindi pa namin masabi kung sinu-sino ang mga suspects dahil hindi pa natapos ang aming investigation," pasabot sa maong opisyal kinsa midugang nga wa makapahadlok ang maong insidente sa mga bista sa siyudad alang sa Kadayawan Festival. (AD)