BUKHARON ang pula nga karpet alang sa kongresista sa Sarangani Province nga si Manny Pacquiao sa iyang paghiabot sa Singapore karong adlawa.
Ang Singapore Government ang miimbitar sa 7-division world champion alang sa usa ka goodwill visit nga gikatakda sugod karong adlawa hangtod na sa Dominggo.
Kini maoy unang biyahe ni Pacquiao sa Southeast Asian city-state.
“It’s so exciting,” matod ni Lynelle Seow sa Singapore Tourism Board sa telephone interview sa abs-cbnNEWS.com. “He’s such a boxing hero not only for Filipinos but for all Asians.”
"We’re very excited. We’re so proud of him as well,” dugang ni Seow, ang Area Director sa Pilipinas ug sa Brunei.
Ikahimamat usab ni Pacquiao ang mga batan-ong boksidor sa Singapore kinsa mga miyembro sa Singapore Boxing Federation.
Nagtuo si Seow nga ang pound-for-pound king mohatag og mensahe nga makapadasig sa mga batan-ong boksidor sa Singapore.
Isuroy usab si Pacquiao sa mga bag-ong maanindot nga dapit sama sa Universal Studios Singapore, Marina Bay Sands ug Singapore Flyer.
Sa laing bahin, ang Philippine university ang miimbitar usab sa boksidor kinsa usa na ka kongresista karon alang sa usa ka anniversary event karong Agusto 26.
Ang taho nagkanayon nga si Pacquiao motambong sa 76th founding anniversary sa Silliman University Law Alumni Association sa Moot Court, Villareal Hall sa Silliman University in Dumaguete City, Negros Oriental.