HUMAN mikumpisal si Daanbantayan Mayor Maria Luisa Loot nga nasugamak siya’g grabeng pagpangasaba gikan kang Gobernador Gwen Garcia human napakyas ang ilang lungsod sa pagsalmot sa Pasigarbo sa Sugbo atol sa 441st Founding Anniversary sa lalawigan, nga niya pa, tungod sa kahait sa mga gipangbuhiang pulong, wa gyud niya kalikaye ang pagpaagas sa iyang mga luha kay ang iyang pagduol sa Kapitolyo dili man alang sa iyang personal nga panginahanglan kon dili alang man sa iyang mga konstituenteng mga Bantayanon.

 

Dali sang mibawos ang Gobernadora sa paghingan kang Loot og baga’g nawong kay naa pa kini dagway nga modoul sa iyang opisina arun mangayo og suporta alang sa umaabot nga Festival sa Haladaya unya gi-indiyan niini ang kasaulugan sa Probinsya.

Updates on President Benigno Aquino III's presidency

Giangkon sa Gobernador nga nasuko siya pagmaayo kang Loot kay mismong mga gagmayng mga lungsod ang naningkamot man gani sa pagpadala og delegasyon unya ang Daanbantayan pa hinuon nga kanhi na kampeon ang dili makagasto alang niining maong kalihukan.

Si Mayor Loot sa dihang atong gibalikan sa Alagad sa dyRF Radyo Fuerza mibawos sa pagtubag nga dili niya igbale nga hinganlan siya’g baga og nawong basta kay iyang gihimo ang iyang katungdanan sa pagka-inahan sa iyang lungsod. Unya niya pa nga bahala na og baga siya og nawong basta kay kining iyang dagway orihinal ug wala nagpa-injection ug nagparetoke.

Kining maong away maoy nagbutyag sa kamatuuran nga kining gipasiugdahang Pasigarbo usa ka kalihukan nga kon dili man gani matawag nga pinugsanay, apan mahulog da nga klasmeyt sa hangyo lobo. Kay samtang hatagan ka sa higayun sa pagdesisyun sa pagsalmut o dili, apan sa kaulahian masugamak ka ra man gihapon sa kastigo sa yawyaw kon dili ka mosayaw.

Ang nakaparat kay sama sa “Suroy-Suroy sa Sugbo”, ang mga lungsod sab gihapo’y paabagahon sa ilang gasto nga duna lay gamay nga amot gikan sa Probinsya. Nganong gikinahanglan pa mang mosakripisyo ang kalungsuran ug mogasto og dakong kantidad nga ila untang magamit sa ila mismong panginahanglan arun lang gyud pagtagbaw sa garbo sa ilang giilang inahan sa lalawigan og sa iyang pipila ka mga kahigalaan?

Si Bise Gobernador Greg Sanchez mibutyag nga sa iyang nasayran, mokabat gyud ngadto sa P50 Milyunes ang nagasto alang sa maong Pasigarbo sa Sugbo. Hinuon dili man kini angay ikabalaka kay gamay da kaayo kining maong kantidad ikumpara sa mamahimo niining maayong epekto sa turismo ug sa negosyo nga mga Sugbuanon ra gihapon ang makapahimulos sa unahan. Gawas pa, kita gud ang pinakadato nga lalawigan sa tibuok nasud, mao nga pipitsugin ra kaayo kining maong kantidad nga atong ikasakit.

Pero kon dili kita magminaot, ang kamatuoran dayag kaayong makita sa atong mga mata kon unsay mga kakuwangan sa panerbisyo intawon sa atong kalungsuran ug katawhan sa Probinsya. Hinaot pa, nga ang atong mga lider magbaton og delicadeza ug konsensya sa pagtubag sa nag-unang pangihanglan sa katawhan sa ilang pagpanerbisyo ug dili kay maoy unahon sa pagtagbaw ang ilang kaugalingong pasigarbo.