Nalzaro: Latos ug labhag
DILI aron makadaginot ang gobiyerno maoy nag-unang rason nganong gusto sa mga nasudnong magbabalaod nga i-oktaba ang barangay ug Sangguniang Kabataan elections nga gikatakda karong Oktobre 25. Ang tinud-anay nga rason mao ang personal nga motibo sa mga magbabalaod labi pa sa mga kongresista aron dili sila makagasto kay bag-o pa silang migaSto sa ilang kandidatura niadtong miaging Mayo nga eleksiyon. Kon sa boxing pa ni, ma-igo sila sa left hook ug right hook combination.
Ngano man? Kay ang mga mokandidato sa pagkakapitan o barangay official labi pa ang mga incumbent nga nagamit niining maong mga kongresista panahon niadtong miaging eleksiyon, moduol man nila aron mangayo og amot para sa ilang kandidatura.
Mo-ingon sila nga non-partisan nga barangay ug SK election?
Ayaw na lang ta kay sila maoy gigamit sa mga kanahang pulitiko panahon sa eleksiyon. Kadaghang mga barangay officials ang nangampaniya sa ilang mga amo nga mayor, gobernador ug kongresista matag eleksiyon.
TABANG
Karon kay eleksiyon naman sa barangay, sila na usab ang modoul sa mga pulitiko aron mangayo og tabang. Nagtuo kaha kamo nga ang mga mokandidato sa barangay mogasto sa ilang kuwarta alang sa ilang kandidatura? Puro kana pinarayigan sa mga pulitiko.
Unya dako god gasto ang kongresista niadtong miaging eleksiyon.
Ang mga bag-o wala ma-release ilang Priority Development Assistant Fund (PDAF) o kanang pork barrel. Busa wala pa silay komisyon. Unya nagatuo kaha mo nga mokuot sila sa ilang kaugalingong bulsa aron lang ihatag sa mga mokandidato sa barangay. Matod pa ni kanhi Mandaue City Mayor Pedong Ouano, nga wala pa gani ang labhag sa iyang likod, latuson naman pod siya. Buot ipasabot nga wala pa gani makabawi sa gasto niadtong Mayo nga eleksiyon, karon mogastu na pod. Aw, mao man gyod na ang pulitika dinhi sa Pilipinas.
KURAPSIYON
Si Padre Melo Diola sa Dilaab Movement usa sa mga nagsuporta sa pagwagtang saSangguniang Kabataan gumikan kay taas kuno kaayo ang degree sa kurapsiyon og ingon man immoral. Kon mao man lang gani kini ang atong basihan ang krapsiyon, aw, mas maayo atong ipawagtang o ipa-abolish usab ang Kongreso gumikan kay naghitak usab diha ang kurapsiyon. O ba kaha ang tanang burukrasya sa kagamhanan kay ang tanang naa man gyod
na ang kurapsiyon.
Dili lang usab siguro kanang maong aspeto ang atong tutukan.
Sama sa akong gika-ingon sa miaging mga lindog gikinahanglan siguro nga atong tul-iron ang sayop kon unsa man ang nahimo sa mga sakop sa SK. Maayo baya nga kining mga batan-on ma-expose sa governance. Training ground na nila.
(bgnalzaro@gmanetwork.com)