GIPASAR sa dakbayan sa Lapu-lapu ang ilang curfew ordinance sa miaging tuig agi og tubag sa mga krimen nga nalambigitan sa mga menor-de-edad sa siyudad.
Kon nakapaminos ba kini sa mga krimen sukad gipatuman ang mao nga ordinansa mao pay tan-awunon.
Kay sa nanglabay nga mga buwan, daghan pang linuog nga mga krimen, sama sa rape ug pagpatay, nga naglambigit sa mga menor de edad.
Ang curfew tipik lang sa solusyon sa pagpugong ug pagkombate sa mga krimen kay gikina-hanglan ang mas lapad nga lakang batok niini.
Ang lakang gikinahanglan nga magsugod diha mismo sud sa balay nga ang papel pagadad-on sa mga ginikanan.
Apan ang nakaparat kay daghan sa mga ginikanan karon ang wa magpakabana tungod kay mas busy sa pagpangita og kuwarta o nagpalabi sa ilang mga bisyo.
Daghan sab ang mga pamilya nga sa ngan lang kutob apan wa mag-function. Kon di man gani, naguba gyud kini.
Bisan tan-awon pa ang pagkatawo ning mga menor-de-edad, imong makita nga duna gyud silay suliran sa pamilya.
Gawas sa pamilya, gikinahanglan sab nga molihok ang barangay alang ning grupo sa mga batan-on.
Kay sila man ang mas nakaila niini.
Gikinahanglan nga dunay mga programa nga mopalambo sa kinabuhi sa mga batan-on sumala sab sa nalatid sa mga balaod. Di lang kay ma busy ang mga barangay official sa pagpamulitika.
Tinuod magamit ang curfew, apan di ni maoy tambal sa suliran sa mga menor.