MIKUNHOD ang mga kaso sa dengue sa dakbayan sa Mandaue kon itandi sa miaging tuig.

Kini maoy gipahibawo ni Dr. Debbie Catulong, kinsa maoy Dengue Program Coordinator sa Mandaue City Health Office.

Updates on President Benigno Aquino III's presidency

Matod ni Catulong nga basi sa talaan sa Department of Health sa tibuok lalawigan sa Sugbo sa miaging tuig, ang siyudad sa Mandaue nabutang sa ika-limang puwesto nga adunay 127 ka mga kaso sa dengue samtang upat ang nangamatay.

Apan ning tuiga, gikan sa Enero hangtod Agusto, ang dakbayan sa Mandaue nabutang na lang sa ika-siyam nga puwesto nga adunay 65 ka mga kaso sa dengue apan way gikatahong namatay. 

Nagkanayon si Catulong nga bisan pa niini padayon ang ilang mga programa batok sa dengue ilabi na sa mga barangay nga taas ang kaso sama sa Casuntingan, Maguikay, Pagsabungan ug Guizo.

Iyang gibutyag nga ila na karong gihunong ang fogging operation human masuta nga gawas nga makadaot sa panglawas di usab epektibo ug ang ila karong gigamit mao na ang misting operation. (DRT)