TALANDUGON ang kahimtang sa usa ka lalaki human giluba kagahapon mga alas 1:30 sa kadlawon sa Divisora ning siyudad sa Cagayan de Oro.

Giila ang biktima nga mao si Joel M. Moandan, 27, ulitawo, taga Upper Carmen ning siyudad.

Updates on President Benigno Aquino III's presidency

Sa pakighinabi sa Sun.Star Superbalita ngadto kang Janice, 17, kinsa igsuon sa biktima nibutyag nga kuyog sa iyang igsuon ang uyab niining si Jenelyn Suarez dihang nahitabo ang insidente.

Nasayran nga gikan kini sa usa ka balay kalingawan ug manguli na unta niadtong tungora.

Gisaysay ni Janice nga posibleng natripan lamang ang iyang igsuon tungod kay wala man kini kaaway.

Nag-atang na og masakyan ang mga biktima uban sa uyab dihang kalit lang giduolan sa wala mailang lalaki ug giluba ang tiyan niini hinungdan sa pagkalaslas ug migawas ang tina-i niini.

Ang uyab mismo sa biktima ang daling nidala niini sa Northern Mindanao Medical Center (NMMC) apan pipila usab ka minuto nawad-an sa panimout ang uyab tungod sa sobrang kahadlok.

Sa pagsulat ning balita padayon pa nga giobserbahan sa mga doctor ang biktima kinsa anaa sa talandugon nga kahimtang samtang padayon pa nga giila sa Police Station 1 (PS1) sa Divisoria ang responsabli sa pagpangluba. (SVB)