DUHA ka mga bata ang pulos nilanding sa balay tambalanan human nabanggaan sa managlahing dapit niadtong Huwebes sa hapon ning sa siyudad sa Cagayan de Oro.
Unang biktima mao si Raul Madrona, 6, taga Barangay 31, ning siyudad.
Nahitabo ang insidente niadtong Huwebes mga alas 11:00 sa buntag dihang nagdula daplin sa dalan ang biktima kuyog ang laing mga bata.
Kalit lang nga midagan tunga sa kalsada ang biktima hinungdan nga nasapon kini sa usa ka Crosswind nga nakuha ang plaka nga CTB-779 apan wala maila ang driver niini.
Bun-og sa lawas ang naangkon sa biktima ug nagisi ang agtang niini. Human misibat ang sakyanan dali sab nga gitabang si Madrona ug gidala sa Northern Mindanao Medical Center (NMMC) kinsa padayon pang giobserbahan sa mga doctor ning panahona.
Gikatakdang susihon sa Roads and Traffic Administration (RTA) ang nanag-iya sa maong sakyanan.
Laing bata ang nabanggaan mga alas 1:20 sa hapon sa Corrales Extension ning siyudad.
Giila ang biktima nga mao si Annie Efamonte, 7, taga Agora, Lapasan ning siyudad. Nasayra gikan sa ayaan sa biktima nga nahinabi sa Sun.Star Superbalita nga paingon unta nga moeskwela ang biktima ug nitabok gikan nga nanaog sa laing motorela nga gisakyan dihang nasapon sa usa ka motorela nga gimaneho ni Jutherford Sullano.
Nagisi ang agtang ug kilay sa biktima gawas pa sa bun-og sa lawas nga naangkon niini.
Gidala deretso ang biktima sa NMMC ug padayon pang giobserbahan. Ang driver boluntaryong mitahan sa Roads and Traffic Administration (RTA). (Stephanie V. Berganio)