USA ka lalaki wa na kaabot nga buhi sa ospital human gipusil sa wa mailhing mga suspek didto sa Public Market, Purok 4, Barangay Poblacion, lungsod sa Mawab, Comval Province, Biyernes sa buntag.
Nailhan ang biktima nga mao si Ruben Reyes "alyas Intong" 17, ug molupyo sa lungsod sa San Francisco, Agusan del Sur.
Sa report gikan sa Mawab Municipal Police Station nasayran nga nahitabo ang pagpamusil pasado alas 10:15 sa buntag samtang nagbarog lamang ang biktima atbang sa usa ka public comfort room sa maong lugar, kalit nga miabot ang wa mailhing lalaki ug gipusil siya gamit ang kalibre .45 nga pistola.
Nahiagum og samad pinusilan sa kalawasan si Reyes ug gisuwayan pa unta og dala sa Davao Regional Hospital sa siyudad sa Tagum.
Apan wa na kalahutay ang biktima ug gideklarang dead on arrival sa mga doktor.
Human sa pagpamusil, ang suspek dali nga misibat sakay sa usa ka motorsiklo nga way plate number.
Mga miresponding sakop sa Mawab Municipal Police Station nakahipos og duha ka mga basiyo sa kalibre .45 nga pistola nga maoy gituohang gigamit sa mga suspek sa krimen.
Kapulisan sa lungsod sa Mawab mihimo na og dugang imbestigasyon sa hitabo. (Marvin Pineda)