SUNODSUNOD nga kalihukan ang ipahigayon sa Cebu Schools Athletic Foundation Inc. (CESAFI) karong adlawa hangtod ugma alang sa bag-ong events nga gihangop niini.

Karong alas 4:00 sa kadlawon ipahigayon ang Run for Cesafi: The 1st Cesafi Fun Run sa Osmena Boulverad atubangan sa Cebu Norman University.

Ang mga kategoriya nga naglangkob sa lumba mao ang 5K, 3K ug 1K alang sa mga opisyal sa Cesafi ug coaches.

Ang mga mananaog sa kompetisyon makadawat og ganting salapi.

Nagkanayon si Cesafi commissioner Felix Tiukinhuy nga ang lumba alang lang sa mga estudyante sa mga tunghaan nga sakop sa Cesafi.

Ang tanang mga athleta sa Cesafi gawas lang sa track and field puwede sab nga makaapil sa lumba.

Ang rehistrasyon nagkantidad og P20.

Unya inig ka ugma ipahigayon ang opening ceremonies sa sporting events nga pagadayandayanan sa Mr. Cesafi Pageant alang sa juniors ug seniors divisions.

Ang kalihukan sugdan sa alas 9:00 sa buntag sa Cebu Colisuem. Ang modaog sa pageant mao morepresentar sa Cebu alang sa PRISAA event.