Cesar Labor

Sandiganan

NANGANDOY ang manindahay sa merkado publiko sa Barili nga malingian unta sa kagamhanan sa lungsod ang ilang kahimtang.

Ilang gihulagway nga haguka ang pamunuan kay dugay na silang nag-antos sa katulo sa building sa ilang merkado. Naghatag sila og arkabala apan wala tagda ang buslotong atop. Nagkalandrakas usab kay walay sistema bahin sa pagbahig asa ang wet ug dry goods section. Hinoon, motulo ra man na og mag-ulan.

* * *

Ang problema sa merkado sa Barili tipik lamang sa ubang mga suliran sama sa mga hitabong tulis, patay ug drugas. Kon dili kini matagad, adto mobanda sa liderato ni Mayor Teresito Mariñas. Pun-an pa sa gisabod nga intriga nga dili himsog ang relasyon politikanhon tali sa mayor ug bise-mayor. Inig pasalig ni Vice Mayor Marlon Garcia, dakog bintaha nga naa dayon kay lig-ong taytayan ngadto ni Kongresista Pablo John Garcia ug Gobernador Gwen Garcia nga iyang igsuon. Namatikdan nga kon mopasalig si Mayor Mariñas mag-meeting pa sila ug walay daling makab-ot nga kalamboan. Dunay pangagpas nga sa 2013 nga eleksyon, mag-atbang sila si Mariñas ug Garcia. Unsa kahay ikasulti sa mga konsehal kaniadto nga sa kalit lang gitalikdan sa mayor.

Updates on President Benigno Aquino III's presidency

TALISAY UG LAPU-LAPU

Gitagad gyod sa pamunuan ang mga vendors sa Talisay ug Lapu-lapu City. Hapit na mahingpit ang katukoran sa Macapagal-Gullas Public Market sa Lagtang Talisay. Sa dili madugay balhinon na sa Lagtang ang Tabunok Public Market. Makaangkon na unya ang mga vendors og hamugaway nga puwesto ug makahanggab sa lab-as nga hangin.

Makasulbad pod kini sa kahuot sa trapiko sa Tabunok nga giharian sa mga trisikad ug tricycle. Hinuon, dunay mireklamo kay tuyoon ang maong dapit ug ang katawhan adto na mangompra sa pribadong merkado sa Tabunok. Bunga lang kini sa negatibong pangagpas sa mga vendors. Kining negatibong hunahuna mobunga og pagtuo nga ang husto himoong sayop.

Samtang sa Lapu-Lapu, hapit na mahugno ang gabok ug karaang merkado. Ipaayo kini ni Mayor Paz Radaza nunot sa pag-awhag sa mga vendors nga mobalhin sa daplin sa karsada ug pabalikon sila sa higayon nga mahuman na ang pagpatahom ug pagpalig-on sa karaang merkado. Gikahinangop kini sa mga manindahay.

HIKAWAN SA PAGPILI

Makalikay na unya ang gobyerno sa dakong gasto sa piniliay sa barangay nga mokabat og P3.4B sa 42,000 ka mga barangay sa tibuok nasod. Si Bise Presidente Jojo Binay misugyot nga wagtangon ang piniliay sa barangay ug SK. Ang mayor mao nay motudlo sa kapitan ug ang kapitan mao nay mopili sa iyang mga konsehal aron molusot gilayon ang proyekto.

Apan nakakawhat og pagsupak ang sugyot ni Binay kay mahikawan sila sa pagpili sa gusto nilang mangulo sa ilang barangay.

Gisalikway ang ilang balaanong katungod sa pagpili.

(csa_1156@yahoo.com-0905-250-4643)