SA pagsaka sa tensyon sa territorial claims sa mga kaislahan sa South China Sea human giangkon sa People’s Republic of China ang ekslusibong katungod sa pagpanag-iya sa kinatibuk-ang Spratly’s Chain of Islands, atubangan mismo sa mibisitang Commander of United States Pacific Command Admiral Robert Willard, mikumpisal si Armed Forces Chief of Staff Ricardo David Jr. nga dili mangilabot ang atong nasud sa bisan unsang armadong kagubot tali sa mga claimants nga gilangkuban sa Pilipinas, Vietnam, Taiwan, Malaysia og Brunei.
Kini dili tungod kay maoy polisiya sa atong gobyerno ang pagka-pacifist kon dili, matod pa, ni General David nga wa man usab kita’y kapasidad nga mopabuto’g armas batok sa higanteng nasod sama sa China nga dili lang karon kusgan sa natad sa ekonomiya kay migawas man karong bag-o nga 2nd Largest Economic Power sa tibuok kalibutan, apil na usab dinhi ang dili na matiaw-tiawan nga paglambo sa ilang Armadong teknolohiya ug kapasidad.
Sa walay lipud-lipud nga pag-angkon, gisulti ni David nga gikinahanglan na karon ang pagtinuod sa gobiyerno sa AFP Modernization Program kay wa kitay kredibol nga Air Force, kay wa man sab tay mga modernong mga eroplanong igugubat. Ang atong Navy nagsalig lang sab sa mga salin sa Estados Unidos nga tungod sa kadaan gipanghatag nalang dinhi sa ato kaysa maglabad ang ilang ulo ug asa ipahimutang kining mga biya nila nga mga patrol boats.
Mao nga kun aduna’y mahitabong enkwentro karon sa Spratly’s, ang bugtong mahimo ra gyud nila mao ang pag-alerto sa atong mga sundawo nga nakadestino intawon sa Kalayaan Group of Islands nga magbantay og maningkamot nga sila makadepensa sa ilang kaugalingon gamit ang personal nga abilidad ug paningkamut kay ang atong gobiyerno wa may ikaabag sa ilang kahimtang.
Ang nakasubo man gud niini kay kita sa Pilipinas ang adunay dakong bentaha sa legal nga kombati kay gawas nga duol kaayo kini sa atong archipelagic waters, ang mga okupante ning maong mga isla sa Spratlys sa dugay nang mga panahon ang kinabag-an puros man mga pamilya sa mga mangingisdang mga Pinoy unya misulod na lamang sa estorya ang China ug ubang mga nasod human migawas sa pagtuon nga dako diay kaayo og nakatagong oil reserves nga gihuptan kining maong mga isla.
Sama sa gipaabot, ang Estados Unidos midestansya ning maong isyu ug mipadayag nga maoy ilang suportahan ang malinawon nga pagresolbar ning maong panagsumpaki. Humana kita gibusdak sa Amerika sa atong territorial claim sa Sabah nga karon nakuha na sa nasod sa Malaysia. Sa dagan sa mga sirkumstansya, nanawkanaw na ang susamang linugdangan ning kaso karon sa Spratly Islands.
Mao ni ang giingun sa School of Realism sa International Law nga igo lamang giuna sa Estados Unidos ang ilang nasudnong interes ug dili ang interes sa laing mga nasod.