PANGAGUD ug ubang sakit-sakit sa panit di layo nga motakboy sa mga tinun-an sa Bagong Silang Elementary School nga nahimutang sa Barangay Pajac, Lapulapu City. Wa pa ni labot sa dengue nga posibling mo-ataki ug ang gikahadlokan nga sakit nga dinala sa ihi sa ilaga. Kining tanan dinala sa tubig nga magpundo sa karsada padulong sa maong eskwelahan. Naduaw nako pag-usab ang maong eskwelahan niadtong Huwebes ug nisamot ang sitwasyon kay ang tubig milahos na ngadto sa kabalayan nga naa sa palibot sa eskuwelahan. Napahibalo na nato ang mga tinugyanan sa city hall labot ning maong problema.

Updates on President Benigno Aquino III's presidency

Ang ilang ika tunol temporaryo ra nga solusyon kay kong maghisgut og drainage, kinahanglan pa man nga sabuton ang mga tag-iya og yuta. Pagkaluoy sa mga bata apil na ang ilang mga magtutudlo. Unsa may sala sa taga Bagong  Silang Elementary School nga mahiagom sila og ingon niini. Sa akong pagbalik nagtuo gyud ko nga duna na’y mga heavy equipment nga nagtrabaho didto kay sa tanang eskuwelahan dinhi sa patag, sa akong pagtuo sila ray nagrabihan kong pagbaha ang hisgutan. Sagdi na lang tong tua sa kabukiran, salabtunon man kaayo nga kinahanglan pa silang motabok og sapa una makaabot sa eskuwelahan. Duna say nia sa patag apan di man mahasol ang ilang pag-adto sa eskuwelahan.

DISCO

Naghisgut sila og curfew alang sa mga batan-on. Gusto unta nako i-apil nila pagsusi ang mga  disco diha sa kabarangayan. Basaha ang blotter di ba daghan kaayong krimen nga nahitabo sa sud sa diskohan. Ang uban sab gikan nga nag disco giatangan ug gipamatay o gipareglahan. Wa koy supak nga maglingaw-lingaw ang atong tagi barangay pinaagi sa disco. Apan kong ang disco mura na lang sab og ohong nga nanurok diha sa mga sitio, angay na kini nga i-regulate. Gawas nga gikabuangan kini sa mga batan-on, og nangamabdos man gani ang uban, abutanan sab ni sa mga gang, fraternity og ubang grupo nga nagka-away og nagpinatyanay. Gawas ning problemaha nahimo sab ni siya nga tinubdan sa illegal nga drugas ug pag-adis-adis sa uban.

Tan-awa ra gud nang uban nga nag-disco, bisan unsa nalang ang stepping mura og wala sa kaugalingon. Gawas nga nakainom di kaha ka magduda nga naka-tama kanang misalida.

Sa iyang panahon isip Director sa Lapulapu City Police, si Sr. Supt. Louie Opus dagha’g mga kapitan sa barangay nga iyang ikabangga tungod sa hugtanay nga implementasyon labot sa anti-noise ordinance. Daghan ang nasuko nga hilig kaayo og disco. Apan mas daghan ang nalipay nga ginikanan kay nahipos og sayo ang ilang mga anak nga kundatan. Gitugut sa Koronel ang disco apan unyag lapas sa oras, way kahadlok niya kining ipaundang. Makita nato nga daghan ang paagi unsaon nga mapugngan kining pagsigi og laag, suroy suroy sa kadalanan niining mga batan-on, gawas sa curfew og pag-regulate sa disco.