MAKUTI, halawom ug kaangayan nga imbestigasyon ang angay himuon sa mga kadagkuan kalabot ning alegasyon sa usa ka tinun-an sa University of Cebu nga gibun-og, gikulata ug gipapriso siya sa usa ka opisyal sa Philippine Drug Enforcement Agency (PDEA) kinsa nag-sideline usab og pagpanudlo sa maong eskuwelahan.

Basi sa saysay ni Edgardo Martinez, 20 anyos, usa ka criminology student sa UC, nga gibadlong siya sa usa ka police intern sulod sa eskuwelahan kalabot sa iyang gisul-ob nga ariyos.

Updates on President Benigno Aquino III's presidency

Tuod man, gitangtang niya ang ariyos isip pagsanong sa pagbadlong. Apan wa matagbaw gusto sa police intern nga kuhaon pa gyud ang ID niini, butang nga wa mosugot si Martinez.

Ning higayona, matod ni Martinez, hugot nga gipiit ang iyang liog sa intern ug gipugos siya pagpasulod sa office sa police interns. Wa magdugay gitawag gilayon sa intern si Mark Maramba, usa ka opisyal sa PDEA.

Saysay ni Martinez nga sa paghiabot ni Maramba ug sa kauban niini nga giila nga Dennis Chiong, gipulipulihan kuno siya og sumbag, patid sa nawong ug sa iyang lawas.

Wa matagbaw, gipapriso pa gyud siya og tulo ka adlaw sa Carbon Police Station ug laing tulo ka adlaw sa Cebu City Jail.

Kon tinuod man gani ni, kakuyaw gud diay ning mga tawhana. Ang usa ka estudiyante daw sa gitratar man og usa ka kuyaw nga kriminal.

Unsa na man diay kasiguroan sa mga estudiyante sulod sa UC nga ania may mga tawo nga nagbahis nga daw sa nangita og kulatahunon? Unsa may dakong sala ni Martinez nga giingon ato man nila pagkulata?

Di lang kay ang kadagkuan sa PDEA, kon dili mohimo usab og makuting pakisusi ang kadagkuan sa UC kay nakaduhig kini sa ngalan sa ilang eskuwelahan.

Taralon ang makasasala sa way lipodlipod.