Severino O. Racoma
Cebu City
Napupos na ang mga adlaw sa atong panag-uban
Kay ako mobiya na man sa imong sabakan.
Gikahimut-an ko ang atong panagkuyog
Kay wala gayud masayang ang panlimbasog.
Karon nadawat nako ang bugti sa pag-alagad
Nga sa dugay nang panahon akong gimanggad.
Daghang salamat kanimo, Sun.Star, sa kaayo mo.
Manghinaot ko sa tanang katuigan ikaw pa molambo.
Sa diha pa lang sa oras nga ako gitanyagan
Gibati ko ang di masabot nga kuba ning dughan.
Nisanap ang kamingaw ning panumdoman
Kay mahanaw na man ko sa imong kiliran.
Sun.Star nahimo kang tipik sa akong pagpakabuhi
Kay tanang hiyas ug pagdumala among gimithi.
Malipayon man kami nga kanimo mobiya
Apan magul-anon kami nga maghandom
Sa panahon nga kita naghudyaka ilabi na
Inig-abot sa Pasko ug sa imong anibersaryo.
Dili na namo mabati ang mga katawa ug komedya.
Mingaw na palandungon ang kagahapon.
Ang bunga sa mga damgo dili mahunlak
Kay di sama sa bulak kansang gihay matagak
Pag-abot sa pag-utlan sa panahon
Diin ang mga layang dahon sa abog na moipon.
Usbon ko dako kaayo ang among pasalamat
Sa panahong kami kanimo nakaalagad!