Kamatayon sa 2 ka inmates gipasusi ni Gwen

GOBERNADOR Gwen Garcia nimando sa pag-imbestigar sa kamatayon sa duha ka mga binilanggo ug pagkaangol sa laing piniriso sulod sa Cebu Provincial Detention and Rehabilitation Center (CPDRC).

Ang gobernador nitahas kang manlalaban Clito Astillero nga maoy mangulo sa discipline and investigation sa Kapitolyo.

Si Astillero gihatagan og lima ka adlaw sa pag-imbestigar sa kamatayon nila ni Simplicio Ta-oy ug Angelito Cabalquinto ug pagkaangol usab ni Pete Acosta. Buot sutaon sa gobernador kon wa bay foul play ang kamatayon sa duha ka mga piniriso ug ang pagdunggab kang Acosta sulod sa bilanggoan.

Gikatakda nga ipatawag si acting jail warden Alito Gabuya ug ang pipila ka mga jail guard on duty atol sa hitabo.

Lakip sa ipatawag mao kadtong mga piniriso nga diha sa dapit nga nahitaboan ug kauban sa mga biktima atol sa hitabo.

Sa sayo pa, si Gabuya nialigar nga si Ta-oy giatake sa sakit sa kasing-kasing niadtong Miyerkules samtang si Cabalquinto namatay tungod sa pagkasamad sa ulo human matumba samtang nanghayhay atol usab sa Miyerkules dungan kang Ta-oy.

Samtang si Acosta nidangat sa tambalanan human gidunggab.

Si Astillero sa iyang bahin niingon nga naghuwat na lang siya nga mapirmahan sa gobernador ang iyang appointment aron masugdan na niya ang imbestigasyon.

Nakadawat og taho ang gobernador nga may nahitabo sulod sa bilanggoan, hinungdan nga nimando siya nga ipa-autopsy ang mga namatay nga piniriso. (JFT)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph