NAUKAY ang kapulisan sa lalawigan sa Sugbo human gi-report nga gi-torture una pa gipatay ang usa sa saksi sa kapulisan sa lalawigan sa Sugbo sa kasong pag-ambush patay kang kanhi Mayor Joselito “Cocoy” Reynes sa Compostela.

Si Cebu Provincial Police director Sr. Supt. Erson Digal nagkanayon nga di tinuod ang report nga nikatap niadto pang miaging gabii hangtod kagahapong adlawa nga gi-torture pinaagi sa pagtuok si Sheena Marie Ester Maru, 22, dalaga, dunay anak, taga Mabini st., Brgy. Looc, Liloan.

Updates on President Benigno Aquino III's presidency

Si Digal niingon nga di tinuod nga gipatay si Maru hinungdan nga naglibog sila kon diin gikan ang impormasyon nga nakapaukay sa publiko labi na sa kapulisan sanglit usa kini ka saksi sa kaso.

Kagahapon sa buntag, si Digal nimando kang Sr. Insp. Rubin Cuizon, hepe sa Provincial Investigation and Detective Management Branch (PIDM), sa pagpahigayog imbestigasyon sa gipuy-an sa biktima.

Nasuta sa kapulisan nga nibuto ang goiter ug namatay sa Vicente Sotto Memorial edical Center (VSMMC) niadtong Agosto 18 sa alas otso sa gabii.

Si Digal niklaro nga bisan pa sa kamatayon ni Maru wa kini makaapekto sa kasong ilang gipasaka batok sa giingong gunman nga si Wilson Pasaul, ug driver niini nga si Elly Ardita, kinsa nadakpan. Si Pasaul pabiling gawasnon.

Matod pa ni Digal nga di gyud vital nga testigos si Maru, apan nagpabiling lig-on gihapon ang ilang mga ebedensiya batok sa mga suspek bisan kon duha na lang ka mga testigos ang ilang gihuptan.

Si Cuizon nga nahinabi sa Sun.Star Superbalita nagkanayon nga way foul play ang kamatayon ni Maru ug di tinuod ang nigawas nga balita nga gi-torture, gituok ug gisulod og sako si Maru.

Ilang na-interview ang inahan ni Maru nga si Marina, 51, ug uyoan nga si Raymundo Dangoy.

Ang duha niingon nga usa ka taho vendor nga higala niini maoy nihatod kang Maru sa ilang balay niadtong Lunes sa buntag, Agusto 16.

Naimbestigar usab nila ang taho vendor ug nibutyag nga naluoy siya kang Maru nga nagtikungkong nga naghigda sa usa sa mga cottage sa Wiggys Beach Resort.

Gihilantan kini nga nagkurog ug nisulti nga sakit ang iyang tutunlan tungod sa toxic goiter.

Iyang gipasul-ob sa iyang jacket ingon man gipandungan sa iyang sinina ang ulo ni Maru sanglit kusog ang uwan.

Iya ning gialsa ug gipasakay sa multicab ug gihatod sa ilang balay.

Si Marina niingon nga niadtong Martes nisamot og maayo ang hilanat sa iyang anak nga nagsigi na lang kinig lubog ug pagka Agusto 18 nagsigi na kinig luwa og dugo ug nireklamo sa kasakit sa iyang tutunlan.

Ila kining gidala sa VSMMC ug pagkagabii sa mao nga adlaw namatay ang iyang anak tungod sa toxic goiter. Matod pa ni Cuizon nga nibuto ang goiter ni Sheena sa ilawom hinungdan nga namatay.