GITABANGAN sa pagpusil sa iyang kainom ang mag-uuma sa Sitio Upper Kantisan, Barangay Paril, bukirang bahin sa siyudad sa Sugbo pasado alas 9 sa milabayng gabii.
Ang biktima giila nga si Pedro Laguna Oliverio, 39, nga nagpuyo ra usab sa dapit nga nakaangkon og samad pinusilan sa iyang ulo nga miresulta sa iyang kamatayon.
Nailhan hinuon dayon sa kapulisan ang mga suspek nga silang Ed Escoto ug Lucrisio Ybañez mga silingan ra usab sa biktima.
Sa imbestigasyon sa Talamban Police Station nasuta nga nag-inom ang biktima kauban sa mga suspek lakip sa mga silingan niini.
Dihang ang biktima ug duha ka mga suspek nagkalalis sa wa matino nga hinungdan kalit lang nga nanukmag ang biktima ug mibunot sa wa mahibaw-ing kalibre sa armas.
Ang duha ka mga suspek nga silang Ybañez ug Escoto daling mikupot sa kamot sa biktima nga naggunit na sa armas ug dayong ilog sa armas ug gipusil sa biktima.
Human sa pagpamusil yano lang nga nagbaktas ang duha palayo sa dapit sa wa matinong direksyon.
Dali nga nanawag og pulis ang mga residente sa dapit ug sa pag-abot wa na ang duha ka suspek nga maoy hinungdan nga ilang gihimo ang manhunt operation.
Tungod niini ang kabanay sa mga suspek nga silang Ybañez ug Escoto miawhag kanila nga motahan nalang aron way mahitabo kanila. AYB