USA ka mag-uuma gipusil patay sa alas 5:00 sa hapon niadtong Biyernes didto sa probinsiya sa Sultan Kudarat.

Nailhan sa kapulisan ang biktima nga mao si Marciano Tabada, 49, minyo ug molupyo sa Barangay Poblacion, Lambayong sa maong probinsiya.

Updates on President Benigno Aquino III's presidency

Sa nahagpat nga taho gikan sa Sultan Kudarat Police Provincial Office, nasayran nga naglakaw ang biktima gikan sa iyang uma apan kalit siya nga giatngan sa wala mailhing mga armadong kalalakin-an ug gipusil gamit ang kalibre .45 nga pistola.

Patay gilayon si Tabada nga naka-angkon og samad pinusilan sa iyang tiyan ug likod nga bahin sa lawas.

Dali sab nga misibat ang mga suspetsado paingon sa wala matino nga direksyon sa dihang ilang nasuta nga patay na ang biktima.

Gibutya ni Sultan Kudarat Police Provincial Director Teng Tucao Mamalinta giimbestigahan na nila ang kaso ug duna na silay mga suspetsado nga gipanid-an alang sa kasulbaran sa maong kaso. (Edgardo Fuerzas)