USA ka biyuda ang nadiskobrehan sa iyang kaugalingong anak nga wa nay kinabuhi sud mismo sa gipuy-ang balay didto sa Barangay Labon, Sulop, Davao del Sur.

Ang biktima giila ni SPO1 Robert Ubas, imbestigador sa kaso, nga si Dolores Bellela, 73 anyos ug lumolupyo sa Purok 6 sa maong lugar.

Updates on President Benigno Aquino III's presidency

Sigon ni Noel Bellela, anak sa biktima nga nagpuyo 200 metros ang gilay-on gikan sa bay sa iyang inahan, nga banda alas 7:45 ang takna sa buntag, Biyernes iya na lang nadiskobrehan ang pagkamatay sa biktima.

Kapulisan nga nihimo og imbestigasyon nagkanayon nga nahiagom ang biktima og samad sa ulo ug gituohan nga gituok gamit ang kaugalingong bra nga maoy hinungdan sa iyang kamatayon.

Way kauban ang biktima sa iyang puluy-anan apan subay sa taho nga banda alas 9 sa gabii niadtong Huwebes, kalit nga niabot ang 37 anyos nga apo niini. Ang maong apo nailhan nga si Crisanto Carvajal ug gihulagway nga lango sa ilimnong makahubog.

Wa na igkita ang suspek human sa insidente ug nagtuo ang mga pulis nga gikabikil niini ang apohan nga nisangko sa brutal nga pagpatay.

Gipailawom sa otopsiya ang patay'ng lawas sa biktima aron pormal nga maduso ang kaso batok sa suspek. (Dondon Dinoy)