11 ka kawatan sikop sa pulis

SAMTANG nalingaw ang katawhan sa pagsaksi sa mga kalingawan atol sa 26th Kadayawan Festival, misiaw sab ang mga kawatan sa ilang modus operandi dinhi sa siyudad sa Davao.

Mga kawatan milampus sa ilang dautan nga binuhatan apan ang uban kanila nasikop sab sa kapulisan, sigun sa rekord sa Investigation Detection and Management Branch sa Davao City Police Office (DCPO).

Sa pagsuwat ning balita, nagtingkagol na sa detention cell sa San Pedro Police Station ang unom ka mga kawatan nga nasikop sa managlahing hitabo samtang lima sab ang nasikop sa mga sakop sa Sta. Ana Police Station.

Mga kawatan giingon nga nasakpan sa akto nga nangawat og cellular phone ug pitaka sa mga biktima kinsa nagtan-aw sa mga kalingawan sa down town area.

Si Gilbert Corsoste, nagpuyo sa Piapi, Barangay 22-C Poblacion, nagbutyag sa kapulisan nga gikuot ang iyang pitaka ni Aurelio Verano, 40, minyo, nagpuyo sa San Juan, Barangay Agdao Centro.

Wa milampos si Verano sa iyang tinguha tungod kay namatikdan siya sa biktima hinungdan sa iyang pagkasikop.

Samtang si Rommel Perosas, 31, nagpuyo sa Magsaysay, Digos City gisikop sab human niya gikuha ang cellular phone ni Amin Rakman, 29.

Ang duha gitakdang pasakaan og kasong theft sa kapulisan ngadto sa City Prosecutor's Office (CPO).

Sa miaging adlaw, gimantala sa SuperBalita ang pahayag ni DCPO Director Rene Aspera, kinsa nagpahimangno sa tanan nga di mokompiyansa sa mga kawatan.

"Iwasan nalang ninyo na mag-dala ng mamahaling gamit kasi nakaka-atrak ito sa mga snatchers," ni Aspera, kinsa midugang nga "everything is fine according to plan" dihang gipangutana bahin sa kahimtang sa kahusay ug kalinaw sa siyudad.

Ang maong opisyal nagsulti nga way mga dagkong hitabo sukad giablihan ang usa ka semana nga Kadayawan Festival.

"There were no major problems in the City's Security from the time the Kadayawan has started. Though hindi natin maiiwasan yung mga maliliit na crimes outside the activity zones, but wala pa namang big problems in relation to Kadayawan activities," panapos ni Espera. (AD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph