DUHA ang namatay samtang duha sab ang nasamdan sa tulo ka managlahing pagpamusil ug pagpanunggab dinhi sa siyudad sa Davao, sigun sa journal sa Davao City Police Office (DCPO) samtang gisaulog ang 25h Kadayawan sa Dabaw.

Namatay mao sila Tomas Salazar, alyas Tata Tomas, 42, ulitawo, nagpuyo sa Palmera Street, Barangay Sto. Niño, Tugbok District; ug Joel Acuna, 43, minyo, nagpuyo sa Cabayugan 2, Barangay Sasa.

Updates on President Benigno Aquino III's presidency

Nasamdan mao sila Alfredo Banabana, 23, ulitawo ug Emmanuel Cortez, 19, pulos nagpuyo sa Gawad Kalinga, Barangay Tibungco, ning siyudad.

Si Salazar gipusil sa wa maihing mamumuno samtang naglakaw gikan sa tindahan ni Mr. Villaroza pauli sa ilang balay sa alas 8:30 sa gabiii niadtong Biyernes.

Ang biktima namatay tungod sa samad sa iyang ulo dihang gipusil sa usa ka tawo nga nagtabon og bandana sa iyang nawong.

Si Salazar gisulayan pagdala sa Holy Trinity Hospital apan gideklara sa mga doktor nga patay na siya dihang miabot sa tambalanan.

Mga silingan sa biktima nagbutyag nga human natumba ang biktima, daling misakay ang killer sa iyang motorsiklo nga way plate number paingon sa national highway.

Kalibre .45 nga pistola ang gigamit sa mamumuno sa maong krimen base sa baseyo nga nahipus sa kapulisan didto sa crime scene.

Samtang si Acuna namatay sab human siya gidunggab sa duha ka wa mailhing mamumuno sa alas 11:00 sa gabii niadtong Huwebes didto sa Crossing Alcantara, Kilometro 7, Lanang, ning siyudad.

Ang biktima nakaangkon og duha ka samad sa iyang kilid dihang gihansakan sa mga mamumuno og hait nga kutsilyo.

Giingon nga miabot ang biktima sa nahitaboan sa krimen tungod kay iyang gihapit ang iyang higala nga si Christine Sabayog, trabahante sa Alcantara and Sons, apan ang misugat kaniya mao ang mga mamumuno.

Ang usa kanila, suma sa imbestigasyon, maoy miduol sa biktima apan misukol ang namatay ug iyang nailog ang kutsilyo, apan naigo ang iyang kilid sa duha ka higayon.

Si Acuna daling gidala sa iyang higala didto sa Southern Philippines Medical Center (SPMC) apan gideklara siya nga dead on arrival.

Laing hitabong pagpamusil sa alas 7:00 sa gabii niadtong Biyernes, nasamdan sab sila si Banabana ug Cortez, pulos nagpuyo sa Gawad Kalinga, Barangay Tibungco.

Mga biktima gipusil samtang naglingkod atubangan sa ilang balay sa wa mailhing tawo.

Ang duha naigo sa ilang walang tiil ug walang kilid mao nga gitambalan sila karon didto sa SPMC.

Samtang gihimo ang makuting imbestigasyon sa kapulisan, nailhan ang suspetsado nga mao si Tikong Timkang, hamtong ang pangidaron ug nagpuyo sa Kabayan Relocation, Barangay Bunawan.

Mga suspetsado sa tulo ka mga insidente gipangita karon sa kapulisan aron silotan sa ilang sala nga nahimo batok sa mga biktima.