IPAHIGAYON sugod karong alas 12:00 sa udto sa SM City Entertainment Plaza ang public preview sa umaabot nga “Philippines vs. the World” boxing promotion.

Ning maong kalihukan, hayan makakuha og ideya ang mga sumosunod sa boksing kon unsang klase nga binukbokay ang puwede nilang masaksihan sa promosyon nga gikatakda karong Agusto 28 sa Waterfront Hotel sa Lahug, Cebu City.

Updates on President Benigno Aquino III's presidency

Sa main event, mopakita’g aksyon si Rey “Boom-Boom” Bautista unya moaway sa undercard sila si Milan Melindo, Jimrex Jaca ug kanhi world champion Florante Condes.

Si Bautista makigbatok kang Mexican Alejandro Barrera, ig-agaw ni Mexican legend Marco Antonio Barrera.

Unya si Melindo makigharong kang Korean Jin-Man Jeon, Jaca makigsukmagay kang Pepino Cuevas Jr., anak sab og usa ka Mexican legend, samtang si Condes makigkontra kang PABA champ Sofyan Effendi sa Indonesia.

Nagtambayayong Ang ALA Promotions ug ABS-CBN alang sa pagpahigayon ning maong dakong promosyon, nga gisuportahan sa MAYA Mexican Restaurant, Sports Exchange Bar and Grill ug SM City Cebu.

Alang sa mga tiket, mahimong motawag sa ALA Promotions (032-2364611), ALA Gym-Banilad Town Center (4162011). Bisaya Ispisyal Ayala (032-2312676), USA Sports Ayala (4121069) ug Waterfront (230-6888).