KON madayon ang ilang away ni Floyd Mayweather Jr. sa sunod tuig, nagkanayon si pound-for-pound champion Manny Pacquiao nga gusto niyang mapahigayon kini sa Singapore.
Mao kini ang gipabuhagay ni Pacquiao pipila ka mga oras sa iyang paghiabot sa Singapore sa miaging adlaw.
Ang mga ekpersto nagtuo nga kon madayon gyud ang away, hayan mao kini ang labing dako nga mahitabo sa boksing diin modawat ang duha ka mga boksidor og $60 milyunes nga premyo kada usa.
Sa interbyu sa Media-Corp, nagkanayon si Pacquiao nga makig-estorya unya siya sa iyang promoter nga si Top Rank boss Bob Arum kabahin sa iyang intensyon nga moaway sa Singapore.
“I will talk to Bob Arum to stage one of my fights in Singapore, maybe next year,” matod pa ni Pacquiao.
Nagkanayon si Pacquiao nga gusto gyud niyang makigharong kang Mayweather kay mao kini ang gipangita sa mga tawo.
“I want to fight Mayweather because people are excited about it. I will ask Bob Arum if this is the match that can be staged here.”
Ang Marina Bay floating platform sa Singapore, nga adunay 27,000 seating capacity, nindot kaayo nga pahigayunan sa away.
Ang Singapore Tourism Board (STB), nga maoy naghikay sa labing unang pagbisita ni Pacquiao sa Singapore, nagkanayon nga andam silang motabang aron mapahigayon ang away sa ilang dapit.