DI makapakgang sa kanser sa prostrate ang lingam massage. Mao kini ang pamahayag ni Dr. Jocelyn Abellana, usa ka medical specialist sa Department of Health (DOH)-Central Visayas, atubangan sa mga sakop sa Konseho sa Syudad sa Sugbo. Sa pagmasahe sa prostrate di sab kuno ugayon ang buhi ug itlog sa lalake.

Buot ipasabot, sama diay kining lingam sa mga tambal nga gipamaligya karon nga dunay tatak “No approved therapeutic effect.”

Updates on President Benigno Aquino III's presidency

Hinuon, ang masahe makatabang sa mga lalaki nga di mogahi ang iyaha apan kinahanglang ipaubos kini sa usa ka clinical environment.

Kon ato lang tamdan ang kadaghanon sa mga magbalikbalik nga magpa-lingam bisan mahal-mahal kini, duna gyud tingale therapeutic effect kining anha sa mga lingam spa. Lalim bay mga seksi ang gisul-ob sa mga masahista samtang kon anha sa klinika, giputos sa gown ug nag-gwantis ang therapist.

Hinuon, di man ang paglikay sa kanser ang tuyo gyud sa magpa-lingam. Mao na lang kanay palusot aron dismolado kunohay. Apan nganong moreklamo man kon makatayming og masahista nga di mosugot og extra service?

Sa laing pagkasulti, ang lingam massage makahatag og laing klase nga therapeutic effect labi na kining extra service apan di lang aprobado sa DOH ug sa kagamhanan.

Kon itugot sa Konseho ug sa Provincial Board kining lingam massage pinaagi sa regulasyon kay lagi makadani man sab og mga turista, makabayad man sa buhis, ug nakahatag og dugang trabaho, unsa kahay buhaton niini?

Tingale pabutangan og karatola nga “Government Warning: No Approved Therapeutic Effect.” Unsa kaha mga sir? Hehe!

Nakahinumdom lang ko sa among panag-istorya sa usa ka higalang Koryano. Di man kini siya manigarilyo ug dihang nakakita siya nga manigarilyo ko, iya kong giingnan nga “Oh, government says that’s bad for your health.”

Ako sab siyang gitubag: “Look around. See many with cigarettes? Many don’t believe government.”

***

Nalingaw ko sa pasiaw karon diha sa Bureau of Customs sa panahon ni Presidente Noynoy Aquino. Duna man goy daghang mga poster ni PNoy nga dunay slogan “Kung Walang Kurap, Walang Mahirap.”

Matod pa sa mga taga Customs, “Kung Walang Kurap, Marami Naghihirap.”

***

Nahibulong lang gyud ko nga samtang napaundang ang mga pasulot sa mga rice import diha sa Bureau of Customs sa tibuok nasud, padayon mang nangabot ang mga bugas nga gipaagi sa National Food Authority (NFA) nga gi-order pa kuno sa panahon pa ni PGMA.

Apan kon daghang bugas ang NFA, nganong nimahal man ang presyo sa commercial rice bisan og daghan kuno og stock?

Matod pa sa usa nako ka kaila nga rice dealer, tungod kini kay dunay pribadong grupo karon nga mao na lay nagkontrolar sa suplay sa commercial rice sa tibuok Visayas ug Mindanao. Kining maong grupo giingong mga tawo kaniadto ni First Gentleman.

Ug unsa ka tinuod nga ang suplay niining maong pribadong grupo gikan sa mga shipment nga alang sa NFA?

Mas maayo tingale kon atong malili karon kon kining mga nangabot nga NFA rice tua ba padulong sa mga NFA warehouse o gi-divert sa mga commercial warehouse.

Kon tinuod man, kinsa kaha ang nagpayong kanila nga makapadayon man sa mga palusot samtang gipawong ang mga importasyon sa bugas nga agi sa Bureau of Customs? Di ba as maayo kon patas nga wala?