Nalzaro: Away binabaye

HUMAN ni kanhi mayor ug karon Kongresista Tomas Osmena ug ni Vice Governor Greg Sanchez, lain na usab ang gika-away karon ni Governor Gwen Garcia. Karon, ang iyang kontra babaye na gyod nga mao si Daanbantayan Mayor Maria Luisa ‘Malou’ Loot. Kini human gibalikas ug gibanghag ni Gwen si Malou atol sa pagbisita niini sa Kapitolyo niadtong Lunes.

Nasuko si Gwen kay wala mosalmot ang Daanbantayan sa Pasigarbo festival niadtong founding anniversary sa lalawigan sa Sugbo. Nakasalmot man gani ang gagmay nga mga lungsod apan nganong wala man ang Daanbantayan. Kining contingent sa Daanbantayan, maayo kini sila. Gani matag Sinulog usa kini sa mga dumadaog. Gusto lang usab siguro sa gobernador nga mabulukon ang Pasigarbo festival mao nga gusto gayod niya nga mo-apil ang Daanbantayan.

WAY PUNDO

Ang rason ni Mayor Loot gumikan kay walay igong pundo nga magamit ang lungsod alang sa maong katuyuan. Dili baya na basta-basta ang gasto. Gikan sa costume, transportasyon ug pagkaon sa contingent. Asa man mokuha si Loot sa maong gasto. Gawas pa, magsaulog ang lungsod sa ilang tinuig nga pista karong Agusto 29, nga diin aduna usab silay kalihukan o kaugalingong street dancing. Mao nga nangayo intawon og panabang si Loot sa iyang pag-adto sa Kapitolyo.

Pero unsa bang pagka-unsaa nga balikas may iyang nadawat. Ug sila pay pasultihon, nakapesos siya. Aw, wala pod siya paalkansi kay mibawos pod siya pinaagi sa pagtawag ni Gwen og diktador. Dinhi na nahitabo ang mga insulto ug mga pagpamoyboy. Wala kunoy ikabawos si Loot, matod pang Gwen, kay gibubu-an og mga proyekto ang iyang lungsod bisan niadtong atol pa sa administrasyon ni Governor Pablo Garcia.

PULITIKA

Pero matod pa sa Tagalog, ang puno’t dulo’ o  ang ugat niining tanan pulitika. Kadtong wala pagsalmot sa Pasigarbo, nipuno lang kadto sa nag-umido ug nag-alintabo nga kasuko ug kasilag ni Gwen ngadto kang Malou. Ngano man? Gumikan kay napilde si Gwen didto sa Daanbantayan niadtong miaging eleksiyon. Wala makapadaog si Loot ni Gwen didto. Mao nay tinud-anay nga hinungdan.

Kaniadto suod kaayo na sila kay puro god babaye. Apan karon puwede nang mangaway si Gwen kang bisan kinsang mayor gumikan kay wala naman siya magkinahanglan kay katapusang termino naman niya karon. Gani mihulga naman siya nga palagputon si Loot sa iyang One Cebu Party. Aw, kon si Loot usab wala man siya magkinahanglan og suporta sa gobernador kay iya man usab kanang tertoryo ang Daanbantayan. Lisod man pod siya pildihon didto. Mao ni giingon nga away babaye. Ayaw lang mo pagbugno ha? Baba-ay lang ug paguwapahay.

(bgnalzaro@gmanetwork.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph