KON suruyon ang mga dapit sa dakbayan sa Sugbo, labina gyud sa downtown area, grabe ang kagubot sa mga sidewalk.

Gani, daghan sa mga pedestrian ang manglakaw na lang sa karsada tungod kay lisod na man ang agianan.

Duha ang nakababag.

Una, daghan na kaayo ang mga nanginabuhi sa mga sidewalk. Dunay mga naninda ug duna say mga nagtanyag sa ilang mga serbisyo.

Updates on President Benigno Aquino III's presidency

Ikaduhang nakababag mao mismo ang mga establisemento nga mi-extend na diha sa mga sidewalk.

Kini nga mga babag wa gyud matagad sa kagamhanan.

Di lisod ang pagpahapsay sa mga dapit nga gitindahan tungod kay mismo ang mga vendor duna may kaugalingong organisasyon.

Kon nakakita sila sa kahagip-ot na sa mga sidewalk, panahon na nga mohimo sila og lakang aron kakuhaan ang kahasol nga namugna sa ubang mga manindahay nga nakababag sa agianan. Di dautan ang pagpaninda sa sidewalk, apan gikinahanglan ang pag-regulate sa gidaghanon.

Sa ikaduhang problema, nahasubay ba sab kaha sa Building Code kining gihimo sa ubang mga magpapatigayon nga gilakip ang sidewalk sa ilang estruktura.

Kon naa man kini sa Code, nganong gipasagdan man lang kini sa building officials sa dakbayan? Ila bang gipiyungan kining mao nga talan-awon tungod sa padangog?

Bisan ila pang libuton ang dakbayan, ilang makita ang kadaghan mga establisemento nga naghimo niini.

Mas dako pa gani kini nga rason kay sa mga manindahay nga sayon ra kaayong i-regulate kon buhaton lang sa mga opisyal ang ilang tahas. Kanus-a pa man mohimo og lakang ang building officials, kana kon mahurot nag tabon ang mga sidewalk sa dakbayan?