MOABOT sa 1.6 milyones ka mga tawo sa tibuok Pilipinas ang narehistro aron mosalmot sa umaabot nga piniliay sa mga opisyal sa Barangay ug Sangguniang Kabataan (SK) unya sa Oktubre 25 ning tuiga.

Ang Central Visayas nahimutang sa ikaduhang dapit nga may daghang mga batan-on nga nagparehistro aron moapil sa pagpili sa ilang mga bag-ong opisyal sa SK.

Apan, ang Central Luzon maoy adunay labing daghan nga mga narehistro nga mga bag-ong botante ug sila usab ang may labing daghang mga narehistro aron mosalmot sa piniliay sa SK.

Updates on President Benigno Aquino III's presidency

Nitala ang Central Luzon og 76,206 ka mga bag-ong botante unya gisundan sa Calabarzon kon Region IV-A nga may 59,264 ug anaa sa ikatulong dapit ang National Capital Regiona (NCR) nga may 42,672.

Samtang sa SK, ang Central Luzon adunay 131, 677 ka mga bag-ong botante unya nagsunod nila ang Central Visayas nga may 111,931 ug anaa sa ikatulo ang Western Mindanao nga may 111, 218 ka mga bag-ong botante.

Moabot sa 1,005,790 ka mga batan-on sa tibuok nasod ang nagparehistro sa bag-ohay lang natapos nga “SK voter’s registration period” nga gipahigayon sayo ning buwana.

Gikataho nga ang Comelec nipadayag nga ang ubos nga gidaghanon sa nagparehistro hayan resulta kini sa mga nanggawas nga taho nga may pipila ka mga magbabalaod nga buot nga di ihinayon ang eleksyon karong Oktubre apan si Pres. Benigno “Noynoy Aquino III buot nga ipadayon gyod ang eleksyon sa barangay ug nisugyot siyang  usa nalang ka representante sa mga batan-on ang pilion unya wagtangon na ang SK.

Moabot og 30 ka mga balaudnon ang nasang-at karon sa Kongreso nga nag-awhag nga di ihinayon eleksyon sa barangay ug nga sa sunod tuig o kaha sa 2012 na kini ipahigayon.

Si Senate President Juan Ponce Enrile may pamahayag nga buot usab niya nga way eleksyon karong tuiga hinuon ilakip na ang eleksyon sa barangay sa eleksyon unya sa 2013. Sa naasoyng tuig, magpili kitag 12 ka mga senador ug ilisan na usab nato ang mga kongresista uban sa gobernador ngadto sa katapusang konsehal sa lungsod ug dakbayan.

Kabahin sa pagwagtang sa SK, si DILG Secretary Jesse Robredo maoy nagtinguha niini kay kon mahanaw sila maka-save ang gobyerno og P3.5 bilyones mga pondo. (JECT)