MOKABAT sa P5 milyunes ang danyos sa pagkaugdaw sa usa ka dakong poultry farm sa Brgy. Liburon, San Fernando, Sugbo niadtong Martes sa gabii.
Nangapaig ang 37,000 ka mga piso sa sa pagkasunog sa usa ka hektaryang poultry farm. Duha na lang ka mga piso ang naabtan sa kabomberohan nga buhi.
Si FO1 Gil Missiona, fire investigator sa San Fernando Fire Station nga nahinabi sa Sun.Star Superbalita, niingon nga naugdaw sa hingpit ang TTFCC Farm nga gipanag-iya sa usa ka Marcilino Co human sa usa ka oras nga sunog.
Matod pa ni Missiona nga ang caretaker nga si Vergilio Alenton nibutyag nga ang electrician nga si Joseph Pemer nakabantay nga ang electrical wiring ni-spark sa kisame sa ikaduhang pultahan sa ikatulong andana sa unang building.
Nimugna dayon kini og kayo ug dali kaayong nakakuyanap.
Gumikan sa ka kusog sa kayo nga nikaylap, niabot kini sa tupad nga building diin duna usay daghang mga piso pa sa manok hinungdan wa makahimo sa paghipos ang mga trabahante sa maong farm.
Sumala pa ni Missiona nga gibutang sa first alarm ang maong sunog.
Tungod sa kalayo ug sa kalisod sa dan, wa dayon sila makaabot sa dapit.
Ang lugar nahimutang lima ka mga kilometro gikan sa Poblacion.
Tulo ka mga firetruck ang ningresponde nga naglakip gikan sa Naga apan wa makalahos kay naguba ang kambiyo.
Ang firetruck sa Carcar wa sab makalahos kay ni-overheat hinungdan nga ang usa ka fire truck sa San Fernando maoy nakalahos sa area sulod sa 30 minutos.
Pag-abot sa mga sakop sa bombero, nangaugdaw na ang usa ka hektarya nga poultry farm.
Si Missiona niingon nga kusog kaayo ang kayo dihang namata-an na sa kapin 20 ka mga kawani.
Wa na nila magamit ang alarm system gumikan sa kadaling nikuyanap sa kayo.
Giklaro niya nga ang kalisod usab sa agianan paingon sa lugar maoy nakaingon kon nganong nalangay usab silag abot sa fire scene.
Mao sab kini ang hinungdan nga nangadaot ang fire truck sa Naga ug Carcar.
Wa hinuoy naunsa sa mga kawani atol sa sunog.
“Pag-abot namo mga pipila na lang ka gutlo naugdaw naman. Igo nalang mi nga nag-clearing sa area. Dunay naka-survive nga duha ka piso na lang gyud to pero napanit naman tungod sa paso,” sumala pa ni FO1 Missiona.